Kastrioti-Partizani, Laçi-Skënderbeu, Tirana-Kukësi dhe Flamurtari-Luftëtari. Jemi në fund të kampionatit dhe tashmë duken të gjitha të paparashikueshme, por java e 30- të mund ta intrigojë gjithnjë e më tepër garën për Europën dhe mbijetesën në Kategorinë Superiore.
Në Fushë-Krujë luhet një ndeshje ekstremesh, me Partizanin që kryeson dhe Kastriotin e fundit të tabelës, që edhe pse po bën një pjesë të dytë të sezonit thuajse perfekt, sërish nuk ka dalë nga zona e ftohtë.
Nëse të kuqve në këtë moment mund t’u lejohet edhe ndonjë hap fals, për vetë diferencën e madhe që kanë me Kukësin (+12 pikë), e kundërta është për Kastriotin. Krutanët i mban në lojë vetëm fitorja dhe çdo rezultat tjetër thjesht ua minimizon shanset për mbijetesë. Nga rezultati i takimit të orës 16:00 ndikohet direkt Tirana, që është e shkëputur me 6 pikë nga Kastrioti dhe luan në “Selman Stërmasi” në 19:00, teksa mëson më parë se si ka dalë rivali.
Në rast se krutanët nuk ia dalin kundër të kuqve dhe nga ana tjetër, bardheblutë fitojnë me Kukësin, atëherë do të thoshte një hap gjigant drejt mbijetesës. Por, mund të ndodhë edhe e kundërta, pasi Kukësi rival i bardhebluve sheh që tashmë i rrezikohet edhe vendi i dytë, pasi gara për kreun duket thjesht si ëndërr. Në orën 16:00 luhet edhe në Laç, aty ku të besuarit e Starovës kanë shansin të parakalojnë në renditje Skënderbeun nëse e mposhtin.
Të dyja skuadrat kanë një shans për të qëndruar në zonën europiane, duke ditur që Teuta këtë javë e ka trepikëshin në tavolinë për shkak të ndeshjes me Kamzën dhe sido që të dalin rezultatet, sërish e ka të sigurt vendin e katërt. Në orën 19:00 në Vlorë zhvillohet Flamurtari-Luftëtari, me vlonjatët që tentojnë vendin e dytë dhe gjirokastritët që duan të shkëputen sa më shumë nga zona e rënies.
Në letër një pikë mund të kënaqë të dyja ekipet, por ky kampionat ka treguar se si vlonjatët, ashtu edhe gjirokastritët, janë skuadra të paparashikueshme. Dy ndeshjet e fundit mes tyre janë mbyllur në barazim 0-0, ndërsa këtë herë presionin e rezultatit duket se më tepër e kanë te Luftëtari, pasi një fitore e Kastriotit e ngushton diferencën, edhe pse mbijetesa varet nga vetë gjirokastritët, që pas 29 javësh kampionat, janë +7 pikë më tepër.