Nga Boldnews.al
Deputetët “opozitarë” kanë vendosur të krijojnë një parti të re, ‘Bindja Demokratike”, me anën e të cilës pritet të përballen me Edi Ramën dhe koalicionin e majtë në zgjedhjet lokale, të parashikuara për në 30 qershor 2019.
Në një mbledhje të grupit parlamentar “demokrat”, deputetët e dalë nga listat e opozitës, kanë rënë dakord që të krijojnë një formacion të ri politik, me anën e të cilit do të legjitimojnë zgjedhjet farsë që synon të organizojë kryeministri, pas deklarimit të opozitës zyrtare, PD-LSI se nuk do të përfshihet në procesin elektoral.
Deputetët “opozitarë”, pasi nuk arritën të bindnin as publikun dhe as veten se përfaqësonin realisht Partinë Demokratike në Parlament, vendosën të krijojnë entitetin e tyre. Në fakt, do të jetë interesante për të parë se cili është elektorati i kësaj partie të re.
Vetë parlamentarët “opozitarë” nuk janë votuar nga elektorati. Emrat e tyre kanë qenë në pjesën fundore të listës së Partisë Demokratike dhe nuk do të kishin asnjë shans për t’u zgjedhur deputet, në rast se të zgjedhur me votat e qytetarëve do të ndërmerrnin hapin ekstrem politik të dorëzimit të mandateve.
Kjo lëvizje e fundit në skenën politike shqiptare duket qartësisht që shkon në interes të Edi Ramës dhe Partisë Socialiste.
“Partia Bindja Demokratike” nuk ka elektorat dhe, natyrisht, nuk ka asnjë shans të marrë drejtimin e ndonjë bashkie në zgjedhjet e parashikuara për në 30 qershor.
Por, ekzistenca dhe sidomos përfshirja e saj në zgjedhjet e bojkotuara nga Partia Demokratike dhe Lëvizja Socialiste për Integrim, i jep mundësi Edi Ramës që të fitojë të gjithë pushtetin lokal, duke i dhënë mundësinë që të justifikohet “politikisht” se arriti sukses përballë “opozitës”.
Rudina Hajdari, e cila duket se po shërben si mbulesë për Astrit Patozin dhe të tjerë ish-drejtues të Partisë Demokratike, ka vendosur të luajë rolin e “fasadës” së demokracisë në Shqipëri.