Ish-gjytari humbet apelin e Vetingut

Ish-gjyqtari i gjykatës së Lartë Admir Thanza, i shkarkuar nga detyra për të tri kriteret e rivlerësimit dhe që u veçua në media si gjyqtari që kishte fshehur një dënim penal në Itali në formularin e dekriminalizimit, humbi apelin e çështjes së tij në një vendim në dhomë këshillimi të kolegjit të apelimit.

“Trupi gjykues i Kolegjit të Posaçëm të Apelimit kryesuar nga Rezarta Schuetz, Ardian Hajdari relator dhe anëtarë Ina Rama, Luan Daci, Natasha Mulaj, sot, më datë 18.04.2019, shqyrtoi në dhomë këshillimi, çështjen (JR) nr.22/2018, datë 19.10.2018 që i përket ankimit të subjektit të rivlerësimit Admir Thanza kundër vendimit nr.40, datë 17.07.2018 të Komisionit të Pavarur të Kualifikimit,” thuhet në një njoftim për shtyp të KPA, në të cilin njoftohet se vendimi i këtij institucioni është lënia në fuqi e vendimit të shkarkimit.

LEXO EDHE  Dorëheqja e Haradinajt, ja pse s'ka reaguar ende Rama

Thanza rezultoi me probleme në të tri kriteret e vetingut, deklarimin e pasurisë, lidhjet e mundshme me elementë të krimit të organizuar dhe aftësitë profesionale, por në seancën dëgjimore para KPK të zhvilluar më 10 korrik 2018, Operacioni Ndërkombëtar i Monitorimit bëri të ditur se kishte zbuluar një dënim me 40 ditë burg për vjedhje në Itali në vitin 1999.