Nga Boldnews.al
Një foto e siguruar nga “Boldnews.al” dëshmon se cili është burimi i frymëzimit të “opozitës së re parlamentare”.
Kryetarja e sapozgjedhur e grupit kuvendor të Partisë Demokratike, Rudina Hajdari, shihet në një moment shumë konfident me ish-nënkryetarin e Partisë Demokratike, Astrit Patozi. Fotoja është shkrepur rreth 3 ditë më parë në një prej lokaleve të njohur në zonën e ish-Bllokut në Tiranë.
Pas këtij takimi, Rudina Hajdari shpallet në Parlament si kryetarja e grupit parlamentar të Partisë Demokratike, ndërkohë që nuk ka marrë asnjë mandat të tillë nga linja zyrtare e partisë më të madhe opozitare.
Në fjalën e parë si kryetare e deputetëve të djathtë, Rudina Hajdari deklaroi se grupi i saj do të hyjë në zgjedhjet lokale, të parashikuara për t’u zhvilluar në 30 Qershor. Është ende e paqartë se me cilin tagër do të hyjë në zgjedhje dhe kush është sigla e partisë që ajo dhe deputetët e tjerë do të përfaqësojnë në zgjedhje.
Por, fotoja, që dëshmon një bisedë serioze të Hajdarit me Astrit Patozin mund të japë përgjigje disa pikëpyetjeve që ngrihen mbi rolin e kryedeputetes opozitare.
Astrit Patozi përfaqësonte krahun anti-Basha në Partinë Demokratike, derisa vendosi të shkëpuste përfundimisht raportet me organizmin politik, ku kishte milituar prej vitesh.
Patozi është aktualisht një prej kritikëve më të ashpër publikë të kryetarit të Partisë Demokratike, Lulzim Basha. Por, kritikat e tij nuk kanë marrë asnjë reagim nga ana e linjës zyrtare të PD-së.
Pas largimit të deputetëve të Partisë Demokratike nga Parlamenti, duket se Astrit Patozi ka gjetur mënyrën për t’u faktorizuar në jetën politike. Ai, mesa duket, po shfrytëzon eksperiencën e pakët politike të deputetes Rudina Hajdari, për të realizuar qëllimin e përfolur prej kohësh- krijimin e një partie të re, e cila do të jetë refraktare e opozitës zyrtare.
Në këtë mënyrë, Patozi mund të arrij të kthehet në jetën politike, duke synuar të sjellë një çarje në elektoratin opozitar. Kjo lëvizje, natyrisht, mund t’i shkojë në favor të të majtëve të Edi Ramës, të cilët shpresojnë në një ndarje të votuesve të opozitës.
Natyrisht, lëvizja e Patozit dhe shpresa e Edi Ramës duket se janë larg realitetit. Patozi dhe Rudina Hajdari nuk përfaqësojnë thuajse asnjë përqindje në elektoratin e djathtë shqiptar. Astrit Patozi prej kohësh është jashtë politikës, ndërkohë që Rudina Hajdari nuk ka asnjë peshë politike.
Rudina Hajdari, e cila u vetëshpall si kryetare e grupit parlamentar të Partisë Demokratike, në fakt, shumë shpejt mund të rezultojë që të vijojë aktivitetin politik me qëllim forcimin e një partie të re, me drejtues Astrit Patozin.
Ky zhvillim duket mëse logjik. Partia Demokratike vendosi pak ditë më parë që të përjashtojë nga radhët e saj ata që vendosën të merrnin mandatet e dorëzuara nga deputetët zyrtarë. Në këtë mënyrë, deputetët e sapo-mandatuar, si edhe të tjerët që priten të vijnë nga listat e opozitës, automatikisht janë pa parti.
Ndaj, ata po synojnë të riorganizohen në një fraksion të ri politik, me drejtues Astrit Patozin dhe si eksponente të lartë Rudina Hajdarin.
