Të mërkurën gara për Bordin e AMF, dy nga tre kandidatët në konflikt interesi

Nga Boldnews.al

Komisoni për Ekonominë dhe Financat i Kuvendit ka njoftuar se të mërkurën datë 17 prill 2019 ora 10.00 do të zhvillojë seancën dëgjimore me kandidaturat për kryetarin e Bordit të AMF, kryetarin në detyrë Pajtim Melani, kandidatin e fazës parë Olsi Çoku dhe shefin e kabinetit të ministrisë së Financave Ervin Mete.

Burimet bëjnë me dije se dy nga tre kandidaturat, Olsi Çoku dhe Ervin Mete janë në kushtet e konfliktit interesit dhe ndalimit të ligjit për tu zgjedhur si antar/kryetar të Bordit të AMF pasi kanë punuar për subjektet në mbikëqyrjen e AMF gjatë tre viteve të fundit.

Skualifikimi i Çokut për konflikt interesi

Burimet nga Kuvendi bënë me dije se Çoku është përjashtuar nga gara herën e parë të kandidimit pasi nga vlerësimi ligjor i Drejtorisë së Monitorimit rezultoi nuk përmbush kriteret e eksperiencës 7 vjeçare(ish-komentator sporti dhe pa eksperiencë në tregjet financiare) dhe për më tepër në konflikt interesi me subjektet tregtare që mbikëqyr AMF. Sipas faqes zyrtare te bankës Credins, aksionere e bursës ALREG rezulton se Olsi Çoku ka punuar me kohe te pjesshme për këtë subjekt.

Sipas deklarimeve në seancën dëgjimore në Komisionin për Ekonomi dhe Financa, të datës 5.2.2019 Çoku referon vetë tre raste të konfliktit interesi (Min 37.20)  kur shprehet se “Për sa i përket eksperiencës së fushës kam asistuar kompanitë e sigutimit të jetës dhe jo-jetës dhe kam ndjekur disa procese gjyqësore”, (Min 37.57)….”Kam asistuar një bankë të nivelit të dytë në fazën konceptuale të Bursës Shqiptare të Titujve Alreg” dhe “Kam ndihmuar në due diligencën e krijimit të fondit të parë të pensioneve private”. Pra është e qartë se është në konflikt interesi në të gjitha fushat e veprimtarisë së AMF-së pasi sipas ligjit “Për AMF”-në “nuk mund të jenë anëtarë të Bordit të Autoritetit persona, të cilët: (a) në tre vitet e fundit kanë qenë ortakë, aksionarë, apo anëtarë të organeve drejtuese të subjekteve të mbikëqyrura dhe (c) në tre vitet e fundit kanë qenë punonjës me kohë të pjesshme apo të plotë në subjektet e mbikëqyrura.

Çoku vjen nga politika si kandidat jofitues për deputet i PS për qarkun e Elbasanit ndërkohë që ambasadori i BE në Tiranë z.Soreca në takimin e javës së kaluar në Kuvend u shpreh se “institucionet e pavarura janë kyçe për zhvillimet demokratike dhe mishërimin e vlerave të BE. Institucionet e pavarura janë instrumente për progresin e reformave apo prioriteteve kyçe që ne i monitorojmë”.

LEXO EDHE  Qeveri teknike apo zgjedhje të parakohshme? Ja çfarë pritet të ndodhë në Kosovë pas dorëheqjes së Haradinajt

Mete ndalohet nga ligji si person politik dhe ish-kryetar i bordit të Insig

Kandidatura e Metes është në kunërshtim të hapur me nenin 5 pika 5 të ligjit “Për AMF”  që parashikon kriterin që personat të jenë të paangazhuar në funksione drejtuese partiake ndërkohë që Ervin Mete është kryetar i G99 sipas faqes së internetit.

Ndërkohë që është dhe kandidat për këshillin bashkiak të PS për Bashkinë Tiranë. Kandidatura për Këshill Bashkiak e vendos edhe në konflikt interesi pasi ndër të tjera AMF mbikëqyr edhe ligjin nr. 10 158, datë 15.10.2009 “Për obligacionet e shoqërive aksionare dhe të qeverisë vendore”ku parashikohet edhe emetimi i obligacioneve nga pushteti vendor.

Por Mete ka dhe një tjetër ndalim ligjor pasi ka qenë kryetar i Këshilli Mbikëqyrës të Insig deri në gusht 2016(document QKB) ndërkohë që ligji “për AMF-në” po në pikën 5 parashikon qartësisht se “Nuk mund të jenë anëtarë të Bordit të Autoritetit persona, të cilët:  a) në tre vitet e fundit kanë qenë ortakë, aksionarë, apo anëtarë të organeve drejtuese të subjekteve të mbikëqyrura. Pra deri në gusht 2019 Mete nuk mund të zgjidhet në Bordin e AMF.

Për më tepër Mete është aktualisht drejtor Kabineti i Ministrit të Financave dhe së bashku me funksionet politike do të cënonte drejtëpdrejtë pavarësinë e AMF dhe legjimitetin e organeve drejtuese të saj. Ambasadori BE ishte i drejtepërdrejtë kur ju drejtua kryetarit të Kuvendit se “… institucionet e pavarura janë të rëndësishme për të përparuar me prioritetet kryesore të reformës për të cilat Shqipëria dhe Bashkimi Evropian kanë rënë dakord dhe të cilat ne i mbështesim dhe i monitorojmë”.

Vijimi procedurës

Komisionit të Ekonomisë dhe Financave do ti duhet të riorganizojë seancat dëgjimore me tre kandidaturat dhe të skualifikojë dy prej tyre duke përsëritur de ja vu e garës së parë ndërkohë që ende nuk ka një konfirmim nëse do të rivotohet kandidatura e vetme e vlefshme e kryetarit në detyrë Pajtim Melani. Sipas ligjit për AMF “Kryetari emërohet nga Kuvendi, me propozimin e Komisionit Parlamentar për Ekonominë dhe Financat, pas një procedure përzgjedhëse” dhe në këtë mënyrë procesi pas Komisionit të Ekonomisë duhet të vijojë për votim në seancë plenare.