Nga Boldnews.al
Në ditën e parë të punës së tij në vitin 2013, ministri i Brendshëm Saimir Tahiri vendosi të sfidojë veten dhe Rilindjen: “Do ia ndryshoj fytyrën policisë së shtetit”, deklaroi ai, ndërsa vijonte ende me entuziazmin si ish-drejtuesi i “Fondacionit Qemal Stafa”, pa e kuptuar se në fund do kishte një fat të ngjashëm me heroin komunist, por jo deri në flijim.
Sfidën e realizoi, në pak muaj ia ndryshoi pamjen Policisë së Shtetit, fillimisht e nisi nga më e dukshmja, uniforma të reja, mjete të reja, spektakël operacionesh, vajza të bukura për dekor nëpër rrugë, nën moton: “Policiaqëduam”. Kjo ishte e dukshmja, por bota e errët e policisë që kurrë nuk e deshëm, ishte pjesa e trafikut të drogës, influencës dhe korrupsionit.
Vendi u mbush me kanabis përgjatë viteve 2016, për të kulmuar në një rast të paprecedent në vitin 2017, në histerizmin që përfshiu gjithë vendin dhe daljen në majë të piramidës të grupeve kriminale.
Policia nuk u dorëzua, përkundrazi, në pjesën e saj drejtuese u bë njësh me trafikantët. U siguronte paprekshmërinë kundrejt shumave të mëdha, aq sa përqindja e fitimeve nuk ishte më sekret; drejtuesit me uniformën e policisë kërkonin 30 % të fitimeve për çdo kilogram kanabis.
Italia dhe Greqia për pak sa nuk shpallën gjendjen e jashtëzakonshme, kur bregdeti dhe toka e tyre u mbulua me kanabis shqiptar. Matjet ishin me ton, aq sa edhe media nuk shkruante asnjë rresht nëse sasia nuk i kalonte 1 ton, pjesa tjetër nuk “përbënte lajm”…
Ministri sërish mburrej në konferenca shtypi, mbante fjalime pompoze në Parlament dhe shigjetonte kundërshtarët politik se po përdhosin figurën e nderuar të policisë së shtetit. Në fund edhe Rama u detyrua të bënte lëvizjen.
Në mars të vitit 2017 e shkarkoi nga detyra Tahirin, pas presionit të dukshëm ndërkombëtar që e përfshinë Shqipërinë në “hartën e gjelbër” dhe të zezë të kanabisit.
Gjithashtu faktet treguan se kushërnjtë e Tahirit, vëllezërit Moisi dhe Artan Habilaj, ishin kthyer në zotër të kanabisit dhe personazhe të paprekshëm për shkak të mbrojtjes që vinte nga shumë lart.
Sot Tahiri përballet me Gjykatën për katër akuza të rënda, si i dyshuar për lidhjet e tij me Habilajt në trafikun ndërkombëtar të drogës.
Rama hoqi një të “ri karizmatik” dhe emëroi Fatmir Xhafajn, ish-hetuesin famëkeq të sigurimit të shtetit
Në nisje të punës së tij, Xhafaj fshiu me një të rënë të lapsit të gjithë drejtuesit që gjeti në policinë e shtetit, që nga kryepolici Haki Çako.
Edhe pse u mundua të jepte një tjetër pamje policisë, vetë Xhafaj kishte një barrë që nuk e hiqte dot. Vëllai i tij Agron (Geron) Xhafaj, mori dënimin e formës së prerë në Itali për trafik ndërkombëtar të lëndëve narkotike, duke u dënuar me 7.2 vite burgim.
Ndërsa drejtësia italiane dha verdiktin përfundimtar, Agron Xhafaj jetonte jo vetëm i lirë në Shqipëri, por u dyshua se vijonte të mos hiqte dorë nga “zakoni i vjetër” dhe organizonte trafikun e narkotikëve. Për më shumë, Vlora kishte hequr “Klanin Habilaj” në mbështetje nga Tahiri dhe u rikthye “Klani Xhafaj”.
Kjo situatë bëri pis Rilindjen e zhulosur në shumë skandale dhe për të treguar se reagon, Rama detyroi Xhafajn që të dorëhiqej. Mendoi gjatë dhe në fund zgjodhi një emër të papërfolur, gjeneral Sandër Lleshajn, ish-këshilltarin e tij të sigurisë, që nuk dihet nëse e “këshilloi” mjaftueshëm Ramën kur vendi u mbulua nga droga.
Sot Lleshaj ka fshirë disi njollën e drogës, por po rikthen një situatë të rrezikshme, në krijimin e një shteti policor, agresiv dhe mbi të gjitha në shkelje të të drejtave të qytetarëve. Ka nxjerrë nga magazinat policore sasi të madhe gazi lotsjellës që po e përdor pa hesap mbi protestuesit e opozitës dhe qytetarët, që reagojnë kundër prishjes së banesave të tyre.
Gjithçka në mbajtje të pushtetit! Tre ministra në gjashtë vite qeveri, por që të gjithë do mbahen mend për drogë dhe gaz…
