Rikthehet pas 20 vitesh në vendin e krimit/ Ja si më përdhunuan dhe torturan serbët

Vasfije Krasniqi, është një nga të parat femra e cila doli hapur, publikisht për të rrëfyer dhunën seksuale të ushtruar ndaj saj forcat serbe në luftën e vitit 1999.

Gjatë asaj kohe ajo ishte vetëm një fëmijë në moshën 16 vjeç, ndërkohë sot pas 20 vjetësh, më në fund mblodhi forcat për të hedhur një hap para dhe të kthehet në vendin e krimit. Ashtu sikurse për Vasfijen, as edhe për rreth 20 mijë femra të tjera shqiptare të Kosovës, nuk pati drejtësi, ndonëse pati administrata të ndryshme që mision e kishin sundimin e ligjit, si UNMIK-u, EULEX-i apo gjykatat e tjera ndërkombëtare e vendore.

Megjithatë, tmerri i përjetuar, bëri që Vasfija të mos ndalej në kërkim të drejtësisë të cilën ende nuk e gjeti as pas 20 vjetësh.

“Këtu mu shuan ëndrrat e fëmijërisë. Drejtësi kërkova prej vitit 1999 te UNMIK-u, më pas më 2010 te EULEX-i. Mua drejtësia më është mohuar, por unë nuk do të ndalem do të vazhdoj të kërkoj drejtësi jo vetëm për vete edhe për të gratë e tjera”, ka theksuar ajo.

Vasfija ka një kërkesë për familjet e viktimave të dhunës seksuale të luftës.

“Iu kisha lutur familjarëve që të jenë më të hapur, në mënyrë që ata që janë të dhunuar të flasin lirshëm dhe ta kenë mbrojtjen e familjes dhe të institucioneve”, ka shtuar ajo.

LEXO EDHE  Humb ndjenjat një vajzë në plazh

Edhe familjarët e Vasfijes kërkojnë drejtësi, jo vetëm për rastin e saj, por për të gjitha femrat e dhunuara në Kosovë, një drejtësi të cilën nuk ka mundur ta gjejnë në asnjë institucion.

“Kemi ndoshta më shumë se 20 mijë gra e burra që kanë qenë të dhunuar gjatë luftës, andaj nuk duhet dhe nuk guxojmë t’i harrojmë”, ka Nafi Krasniqi, vëllai i Vasfijes.

 

Feride Rushiti, drejtoreshë e Qendrës Kosovare për Rehabilitimin e viktimave të Torturës tha se Kosova nuk ka ditë të veçantë ku shënohet krimi më i heshtur, dhe sipas saj, ky zë duhet të dëgjohet që kriminelët të dënohen.

I pranishëm për ta nderuar të mbijetuarën e dhunës seksuale, Vasfije Krasniqin-Goodman, ishte edhe kryetari i Komunës së Vushtrrisë, Xhafer Tahiri, i cili i premtoi mbështetje, duke kërkuar që të bashkohen me përjetimin e saj, për të kërkuar drejtësi ndaj akteve të shëmtuara nga forcat serbe.

Më 16 tetor të vitit 2018, Vasfije Krasniqi-Goodman, erdhi nga Shtetet e Bashkuara të Amerikës, duke u bërë kështu njëra ndër të mbijetuarat e para e cila pranoi që rrëfimin e saj për dhunën seksuale të kryer ndaj saj nga forcat policore e paramilitare serbe në vitin 1999, ta shfaqë edhe publikisht. Ndërsa më 18 tetor të 2018-s, ajo u dekorua me medalje presidenciale nga presidenti Hashim Thaçi./RTK