Maturantët të cilët nuk arritën të plotësonin formularët e aplikimit për në universitet, kanë një mundësi të dytë.
Ministria e Arsimit ka njoftuar rihapjen e aplikimeve në fund të muajit maj, kur do të ofrohen 5 ditë afat për të plotësuar formularin A1.
Nga data 27 maj deri në datën 31 maj, aplikimet do të bëhen në rrugë elektronike, pra online në ambientet e shkollës.
“Njoftohen të gjithë maturantët/kandidatët që nuk kanë aplikuar me formularin A1/A1Z në Portalin Matura Shtetërore 2019, se Portali i Maturës Shtetërore online dhe Portali e-albania do të hapen për aplikime nga data 27 maj deri më 31 maj 2019, nga ora 09.00 deri në orën 16.00.
Plotësimi online i Formularit A1/A1Z, bëhet në shkollat ku maturantët/kandidatët kanë kryer arsimin e mesëm të lartë ose në shkollën e përcaktuar nga KMSH-ja e vendbanimit, nëse shkolla e mesme që kanë përfunduar është mbyllur. Procesi i plotësimit të Formularit A1/A1Z ndiqet nga një person i ngarkuar nga drejtoria e shkollës, që quhet “mbikëqyrës”. Përfaqësuesit e shkollës marrin kontaktet e maturantit/kandidatit për ta njoftuar më vonë për paraqitjen në shkollë për hedhjen e të dhënave shkollore të tre viteve të arsimit të mesëm.
Shpërndaje me shok/shoqe që do të futet në aplikimet për në universitet këtë vit sepse mund të jetë mundësia e fundit”, thuhet në njoftim.
