Nga Boldnews.al
Shprehja e dikurshme nuk ka kala që s’marrin komunistët, sot është më evidente se kurrë, mjafton që në vend të komunistëve të vihen Rilindasit.
Kërkoi tepsinë e pushtetit, timonin e qeverisjes dhe i mori. Kërkoi kapjen e shërbimit sekret dhe ia arriti. Emëroi në krye të Prokurorisë së Përgjithshme emrin që i serviri në tavoline Ulsiu. Kapi procesin e vetting përmes komisionerëve të zgjedhur prej tij, dhe institucioneve që ka në varësi dhe që furnizojnë me dokumente KPK për njerëzit e drejtësisë. Kapi çdo strukturë të mundshme që qoftë edhe formalisht mund të mbetej jashtë ndikimit Kryeministror.
Sot, Edi Rama hodhi hapin për të marrë kalanë e fundit, Rektoratin e Tiranës. Tentoi ta merrte nën kontroll këtë institucion që gjatë zgjedhjeve, duke kërcënuar rektorin aktual Mynyr Koni, por nuk ia arriti. Duket se në atë kohë zgjodhi strategjinë e gabuar, pasi ndërkombëtarët, ambasadorë dhe diplomatë, të paktën nuk mund të pranonin qoftë edhe për sy e faqe që Rektorin e Universitetit më të madh të vendit ta caktonin banditë me kollare që qëndronin në hije. Kështu, në atë kohë plani Rilindas dështoi, por dëshira e Ramës nuk u zbeh. Pasi kapi protestën studentore, e zbehu, i uli studentët përmes një të ashtuquajturi pakt, vuri në funksion planin B, atë të përdorimit të Rilindasve të rinj dhe një grupi neo-komunistësh që u përfshinë në protestë për të anatemuar dhe sulmuar çdo pedagog, dekan, apo rektor që përkrahu protestën.
Nuk e pati problem që t’i cilësojë si frontin e së keqes, por nuk u ndal me kaq. Në salla të hapura dhe të mbyllura, me presione apo jo, Skënderbeu i Rilindjes, ngushtoi rrethin e frontit armiqësor, duke treguar me gisht vetëm njërin prej tyre, Rektorin e Universitetit të Tiranës. Sot Rilindja zgjodhi që të pezullojë Rektorin, të kërkojë shkarkimin e tij, duke zyrtarizuar një proces që nisi 5 apo 6 muaj më parë. Dhe siç duket tepsia e pushtetit nuk ishte e plotë pa pasur nën kontroll edhe Rektoratin. Ndoshta kjo ishte kalaja e fundit që i kishte mbetur pa u pushtuar nga Skënderbeu i Elisës dhe Sulltani i Shqipërisë….
