Nga Boldnews.al
Rilindasit sot po gjejnë fajtorë që i bënë gjëmën Edi Ramës, ose Skënderbeut të Elisa Spiropalit. Imazhi i vendit prej kohësh ka rënë në sytë e medias botërore, por kishte një fije shpresë që Rama të shfaqej në arenën ndërkombëtare, qoftë edhe me një veshje qesharake, vetëm për të përbërë lajm. Kjo do ishte një info në rubrikën e “show biz-it” ndryshe, jo droga, droga, droga…, krimi, krimi, krimi.., siç e quan me ironi kryeqevetari ynë.
Po nuk ishte e thënë. Grabitja e 10 milionë eurove në Aeroportin e Rinasit nga pesë persona të armatosur, gjunjëzuan shtetin, qeverinë, policinë, e çdo siguri tjetër, por Rilindja edhe këtu nuk e sheh fajin tek vetja, por gjeti armikun e jashtëm, kompaninë kineze.
Të paktën vetë Rama e ka të qartë se kinezëria me kompaninë kineze, nuk ka asnjë lidhje me çështjen e sigurisë në vend, i cili është përfshirë nga krimi kudo. Po për vrasjet në Shkodër kinezët e kishin fajin, po për ekzekutimet mafioze në Elbasan, pranë kinezët kishin gisht? Pas çdo skandali qeveritar duhet gjetur një shkaktar, që në të vertetë është gjithnjë brenda qeverisjes, por i atribuohet tjetërkujt.
Koncepti i propagandës i ka rrënjët shumë më të thella sesa vetë qeverisja e Ramës. Në konceptin e së majtës, agjitpropi (agjitacioni dhe propaganda) kishin vlerë të madhe në formën e regjimit Komunist. Ishte sektori që shpëlante mendjen e qytetarëve, aq sa duhet të besonin se ne ishin “fanari ndriçues” dhe lokomotiva e politikës ndërkombëtare në bllokun komunist.
E sot propaganda që ofron Rama dhe Veliaj, dy gjelat Rilindas në një kotec socialist, po vrasin ndërgjegjen kolektive, e njëkohësisht po u heqin shqisën për të menduar dhe gjykuar. Sot ka plot Rilindas, apo socialistë, njerëz të thjesht, që vuajnë njësoj si çdokush në vend, por sërish lënë pas problemin e tyre të përditshëm, ku qoftë edhe me barkun bosh mendojnë: Ramës po i bëhet padrejtësi…
Ka dy lloje “mendjeshplarësh”; Ata që përfitojnë me vetëdije duke besuar se Rama është i dërguari për të ndryshuar vendin, si p.sh: Elisa Spiropali që e konsideroi Edi Skëndërbe dhe kategoria tjetër që beson se pas çdo dështimi tërësisht të qeverisë, ka një konspiracion të madh.
Këta të fundit socialistët e thjeshtë, por të vrarë nga indoktrinomi i elitës manipuluese, po urrejnë edhe shtetasit kinez, tregtarë të vegjël të tregut të Medresesë….!
