Gjimnastja amerikane, Samantha Cerio, e cila theu të dyja këmbët në një garë rajonale javën e kaluar, u ka bërë thirrje ndjekësve të saj t’i japin fund shpërndarjes së pamjeve.
22-vjeçarja përdori rrjetet sociale për të shpërndarë një mesazh për të gjithë ndjekësit, ku thotë se rishikimi i videos dëmton jo vetëm atë, por edhe familjarët dhe shokët e shoqet.
“Atyre që vazhdojnë të postojnë dhe më bëjnë tag në videon e dëmtimit tim, u kërkoj: ju lutem ndaloni. Të përjetoja dhimbjen dhe të shikoja përkuljen jonatyrale të gjunjëve të mi në jetën reale ishte mjaftueshmërisht e tmerrshme, por nuk është në rregull të vazhdoj ta shikoj atë nga videot dhe fotot vetëm sepse disa njerëz e shikojnë të arsyeshme t’i ripostojnë. Unë kam familje, miq dhe shokë skuadre që nuk u duhet të më shikojnë tek dëmtohem sërish e sërish. Dhimbja ime nuk është argëtimi juaj”, shkroi Cerio në një postim në Instagram.
Të hënën, gjimnastja iu nënshtrua një operacioni dhe shpreson të rikuperohet tërësisht para dasmës së saj të planifikuar për në muajin Qershor me Trey Wood.
