Avokati i ish-deputetit Ervin Salianji, Ledio Braho, e ka cilësuar një proces politik gjyqin për çështjen ‘Babale’.
Braho ka deklaruar se nga përgjimet e prokurorisë rezulton se vetë Policia e Shtetit e ka stisur këtë proces gjyqësor, duke paguar shuma të mëdha parash për Fredi Alizotin, i cili është dhe dëshmitari i rremë.
‘Ka një akt ekspertimi, ku sipas këtij akti ekspertimi ka patur një aktor. Çuditërisht prokuroria ka vijuar hetimin në këtë linjë atë të aktorit. Atë që tha kryeministri një ditë policia e vazhdoi në vijim, padiskutim dhe me ndihmën e Policisë së Shtetit, ku siç del edhe nga Përgjimet, policia e Shtetit ka dhënë shuma parash për të stisur këtë lloj aktrimi dhe këtë lloj dëshmitari, dhe sot jemi në këtë dosje’, deklaroi Braho.
Më tej avokati i ish-deputetit Salianji shton se prokuroria duhet të niste menjëherë hetimet ndaj drejtuesve të Policisë të cilët kanë dhënë dëshmi të rreme para prokurorisë dhe oficerëve të policisë gjyqësore. Ai tha se ky është një gjyq politik dhe këtë e fakton vetë dëshmitari i rreme Fredi Alizoti.
‘Ky është proces politik, është proces i montuar. Nga vetë përgjimet e prokurorisë del se ka pasur drejtues të policisë të cilët kanë gënjyer në dëshmitë e tyre. Poica e shtetit vetë nuk ka bërë asnjë reagim, por prokuroria duhet të niste hetimet ndaj këtyre funksionarëve të policisë së shtetit të cilët kanë stisur dëshmi të rreme. Sepse Fredi Alizoti është tërësisht prodhim i policisë së Shtetit dhe nuk ka asnjë lidhje me këtë ngjarje. Nga vetë përgjimet del që Albert Veliu që në fillim në komunikimet që ka pasur me Fredi Alizotin thoshte se ti s’ke asnjë lidhje me këtë ngjarje. Ndërkohë që sot del që dëshmitari kyç që çon në gjykatë si të pandehur gazetarin Olldashi dhe ish-deputetin Olldashi është dëshmitari Fredi Alizoti, pra dëshmitari i rremë’, tha më tej Braho.
