Pas vendimit të gjykatës së Tiranës, e cila dënoi me 55 vjet burg, 4 të pandehurit për vrasjen e Marvi Mihalit, duket se familjarët e këtij të fundit nuk kanë qenë dakort me vendimin.
Ata akuzojnë gjyqtarët se kanë ndryshuar akuzën ndaj të pandehurve për t’i ulur dënimin.
“Nuk kam kërkuar asgjë, vetëm drejtësinë. Kam thënë që do ta vendos me çdo kusht. Sot çunit tim i ka lëviz pllaka e mermerit sipër varrit. Sa të kem jetë, të gjithë ata që janë përlyer në këtë histori të ndyrë do marrin reston e vet.
Unë nuk do ndaloj së kërkuari drejtësi. Kjo është tallje. Ai e therri, ja nguli thikën nga lart dhe ai ndryshon kualifikimin e veprës penale, heq paramendimin, lë vetëm vrasje në bashkëpunim me dashje, që të abuzojnë me vendimin. Këta gjykatësa s’kanë frikë as nga vetingu asgjë. Nuk i bëhet von se vdiq djali im. Fatin tim të zi e provofshin gjykatësit”, tha nëna e Marvi Mihalit.
