Sukseset për peshëngritësin shqiptarit, Briken Calja duket se nuk dinë të ndalen
Calja ka fituar ditën e sotme medaljen e artë në stilin e shkëputjes në peshën 73kg, në Kampionatin Europian të Peshëngritjes që po zhvillohet në Batumi të Gjeorgjisë. Ai triumfoi në stilin e shkëputjes, ku e mbylli garën me 156kg.
Në provën e parë, Calja realizoi me sukses 152kg, ndërkohë që shtangisti nga Shtërmeni nuk dështon edhe në provën e dytë, ku ngre lart me sukses 156kg. Në provën e tretë shtangisti kuqezi tentoi 160kg, për të vendosur rekord të ri europian, por pa sukses.
Briken Calja është kampioni i trefishtë i Europës një vit më parë, pasi fitoi 3 të arta në shkëputje, shtytje dhe dygarësh. Edhe këtë vit Calja e nis mbarë këtë Europian, ndërkohë që mund të realizojë sërish të njëjtin rezultat pas pak, kur të garojë në stilin e shtytjes.
