Mediat në Itali e kanë bërë fakt të kryer se trajneri i ardhshëm i Kombëtares shqiptare do të jetë Edy Reja. Sipas Radio Kiss Kiss presidenti Armando Duka ka udhëtuar të shtunën në Itali për të takuar ish-trajnerin e Napolit dhe të Atalantës dhe jo Alberto Zakeronin, siç ishte raportuar më parë.
Në një hotel në Bolonja Duka dhe Reja kanë konkretizuar bisedimet e nisura të premten e 22 marsit në Shkodër, menjëherë pas humbjes 0-2 me Turqinë që solli edhe shkarkimin e Panucci-t. Sipas këtij burimi Reja në Shqipëri do të marrë ekzakt pagën që merrte edhe paraardhësi i tij, 250 mijë euro në vit. Me vete të kuqezinjtë Reja pritet të marrë si ndihmës Alesandro Colori-n.
Në rast se Reja do të ulet në krye të Kombëtares atëherë ai do të ishte trajneri i katërt italian që afrohet te kuqezinjtë. Më herët Shqipërinë e kanë drejtuar Beppe Dossena, Gianni De Biasi dhe Christian Panucci.
Sa i përket këti lajmi të ardhur përtej adriatikut, i kontaktuar nga “Report TV”, presidenti i fedaratës Armando Duka është shprehur: “Nuk ka asgjë për të konfirmuar për Reja-n”.
Mbetet për t’u parë se kush do të ulet në krye të Kombëtares, por së bashku me Edy Reja-n kandidatët potencial për stolin e kuqezinjve janë edhe Alberto Zakeroni, Roberto Donadoni, Luigi De Canio si dhe ish-kapiteni i Kombëtares Besnik Hasi.
