Mesatare skandaloze pikësh për Skënderbeun në fazën e tretë të kampionatit. Në 9 javë kanë grumbulluar vetëm 7 pikë në fushën e lojës, pas 2 fitoreve me Laçin dhe Kukësin në shtëpi dhe barazimit në Durrës me Teutën, ndërsa në 5 ndeshje të tjera kanë dalë të humbur. E megjithatë, pikavarazhi u përmirësua me atë trepikësh të marrë në tavolinë përballë Kamzës së përjashtuar dhe zyrtarisht e mbyllën me 10 pikë të mbledhura në total.
Nëse sezoni do të luhej vetëm me një fazë, korçarët do të përpëliteshin për mbijetesë. Kjo ecuri ka krijuar një situatë aspak normale te bardhekuqtë, ndaj edhe Ardjan Takajn është detyruar që t’i vendosë në provë të gjithë lojtarët. Nga burime pranë klubit, duket se vetëm me gishta numërohen ata që mund t’i shpëtojnë “ndëshkimit” nga ana e drejtuesve të Skënderbeut. Të njëjtat burime bëjnë me dije se veç veteranëve si Radas, Vangjeli dhe Muzaka, duket se Dita, Sibo dhe Bregu janë të justifikuar me atë çka kanë treguar në fushën e lojës, duke shtuar këtu edhe lojtarët e rinj në moshë si Sambou dhe Pëllumbi.
Ndërsa të gjithë të tjerët janë nën akuzë për paraqitjet e dobëta gjatë këtij sezoni dhe veçanërisht në dy fazat e fundit të këtij kampionati. Kjo i kushtëzon tashmë që në fazën e fundit të sezonit të impenjohen mbi 100% për të arritur objektivat e ekipit. Dhe presidenti me trajnerin kanë qenë të prerë në kërkesën e tyre dhe hapur kanë bërë thirrje që gjithsecili të tregojë se e meriton fanellën, me të cilën luan
Edhe golavarazhi është si mos më keq. Korçarët kanë mundur të gjejnë rrugën e rrjetës vetëm 7 herë në 9 takime, ndërsa kanë pësuar plot 11 gola nga kundërshtarët. Mesatare kjo që tregon realisht formën jo të mirë të Skënderbeut në këtë sezon./PanoramaSport
