Pal Ndue Gjoni, 82-vjeç, i zoti i shtëpisë e cila u përfshi nga flakët në orët e para të mëngjesit të sotëm, ka rrëfyer momentet e tmerrit që përjetuan në banesë.
“Dëgjova tullat që kërcisnin dhe më doli gjumi. Jam zgjuar shpejt, kisha hallin e fëmijëve. Thirra djalin që të merrte gruan time, që e kam të paralizuar.
Kur e thirra djalin, nuk m’u përgjigj. U gëzova kur pashë fëmijët që kishin dalë në oborr. Ajo që më ndodhi mua, mos t’i ndodhtë njeriu!”, rrëfën 82-vjeçari.
Pal Ndue Gjoni dhe bashkëshortja e tij e paralizuar, e cila u shpëtua nga nipat, janë strehuar te të afërmit e tyre në një banesë pranë asaj që u dogj.
Ndërsa 4 fëmijët pasi u mjekuan, u strehuan tek të afërmit e mamasë së tyre.
Shtëpia e Petrit Ndojt në fshatin Breg të Pukës mori zjarr në orën 2 të natës në rrethana ende të paqarta.
Anëtarët e familjes flinin në katin e dytë të banesës. Petrit Ndoj 40 vjeç me gruan e tij Dava Ndoj 35 vjeçe nuk kanë mundur të dalin dhe kanë vdekur brenda në dhomën e tyre nga zjarri, pasi kishin tentuar të dilnin.
Katër fëmijët e tyre, më i madhi 12 vjeç, u hodhën nga ballkoni dhe shpëtuan bashkë me gjyshin dhe gjyshen e paralizuar.
