Gent Cakaj, kur u emërua në detyrë në postin e Ministrit të Jashtëm mori shumë lavde nga kryeministri Rama si një njeri shumë i lexuar dhe 1000 herë më i ditur sesa presidenti Ilir Meta, por gafat e tij nuk ndalen.
Ai ka marrë pjesë në takimin e ministerialit të NATO-s në SHBA.
Në një intervistë për A2 CNN, teksa foli për rolin e Shqipërisë në NATO dhe rëndësinë e shmangies së rrezikut rus në rajon, ka bërë një tjetër gafë, pas ngatërresës së bërë gjatë Samitit të Diasporës me vargjet e Naim Frashërit të poemës “Bagëti e Bujqësi”.
Duke folur për ndikimin rus në Shqipëri, Cakaj tha: “Lidhur me shqetësimet e sigurisë që vijnë prej veprimeve të Rusisë, këtu mund të nënvizoj 3 faktorë kryesorë, që kanë qenë objekt i diskutimeve të sotme. E para, prishja e traktatit të rrezeve me veprim të mesëm nga ana e Rusisë. E dyta, problemet që vijnë nga aktivitetet e luftës hibride të Rusisë në përgjithësi. E treta, situata e në Detin e Zi, situata e sigurisë në Detin e Zi, thënë më saktësisht, pas incidenteve të shkaktuara nga Rusia në detin Azov”.
Por siç e vini re Cakaj, ministri më i lexuar i Ramës, sërish ngatërrohet. Ai shprehet: “prishja e traktatit të rrezeve me veprim të mesëm nga ana e Rusisë”. Por nëse do të kërkojmë të kuptojmë se çfarë traktati është ky i “rrezeve me veprim të mesëm”, do të konstatojmë se nuk ka një traktat me të tillë emri. Traktati për të cilin Cakaj mund ta ketë fjalën, por që siç duket ose është ngatërruar, ose nuk e di termin korrekt, është: “Traktati mbi raketat bërthamore me rreze të mesme veprimi (INF)”.
