Policia Kufitare godet një tjetër tentativë të “Trafikut ndërkombëtar të lëndëve narkotike”. Sekuestrohet 68 kg lëndë e dyshuar si narkotike kanabis. Arrestohet në flagrancë transportuesi.
Aksioni
Burime zyrtare nga policia e Korçës, bënë me dije se, ditën e sotme, në dalje të Republikës së Shqipërisë, është paraqitur shtetasi G.Gj, 38 vjeç, banues në Divjakë, me mjetin tip “Toyota”.
Pas analizës së riskut të bërë nga Policia Kufitare dhe e Migracionit, është bërë përzgjedhja dhe është ushtruar kontroll i imtësishëm në vijë të dytë dhe më pas në bashkëpunim me autoritetet doganore mjeti të cilin ky shtetas drejtonte, ka kaluar në procesin e skanimit, ku pas verifikimeve u gjetën e sekuestruan në cilësinë e provës materiale:
68 kg lëndë e dyshuar si narkotike kanabis sativa.
Veprimet hetimore dhe proceduriale të mëtejshme u kryen nga specialistët e Seksionit për Narkotikët në Drejtorinë Vendore të Policisë Korçë, të cilët bënë arrestimin në flagrancë të shtetasit G.Gj, për veprën penale “Trafikimi i narkotikëve”.
Materialet i kaluan Prokurorisë pranë Gjykatës së Shkallës së Parë për Krime të Rënda Tiranë, njoftoi Policia.
