Kryeministri Edi Rama i bëri një tjetër ftesë opozitës për t’iu bashkuar tryezës për Reformën Zgjedhore. Pas kësaj ftese ka reaguar, ish-ministrit i Drejtësisë, Ylli Manjani, i cili është shprehur se nuk duhet ndryshuar kodi zgjedhor por i gjithë sistemi.
Me anë të një reagimi në rrjete sociale, Manjani shkruan se nuk mund të ketë Reformë Zgjedhore me një parlament monist.
Sipas tij ka vetëm një zgjedhje dhe një shërbim që Rama mund t’i bëjë demokracisë në këtë moment, është caktimi i datës së zgjedhjeve të reja parlamentare.
Ja postimi i Manjanit:
Reformë zgjedhore pa Parlament pluralist nuk mund të ketë!
——————
Ligjërimi i Ramës që fton opozitën “të bëjë reformë zgjedhore”, dhe pastaj Ai ta miratojë me parlamentin monist, është thellësisht e PAPRANUESHME!
Të paktën për mua është e tillë, nuk e di për Opozitën.
I përkas mendimit se vendi ka nevojë për një reformë të thellë të sistemit politik, ku sistemi zgjedhor është i pari që duhet ndryshuar.
Jo më Kodi, por i gjithë sistemi zgjedhor duhet ndryshuar.
Por në radhë të parë, vendit i duhet një parlament pluralist. Kjo është detyra numër një e politikës. Të tjerat vijnë pastaj.
Sa për të ndërtuar një Parlament pluralist ky Kod Zgjedhor është i mjaftueshëm. Prekja në mënyrë të njëanshme e tij do shënonte fillimin e një përplasje të rrezikshme!
Ndaj ka vetëm një shërbim ndaj shtetit, publikut dhe demokracisë në vend:
Kryeministri të caktojë datën se kur i do zgjedhjet politike parlamentare.
Kaq! Të tjerat janë kot!
