Ish-nëndrejtori i Policisë së Kukësit, Shkëlqim Pepkolaj, ka reaguar pas thirrjes së bërë nga faqja “Kukësi” në Facebook, për të moslejuar kryeministrin Edi Rama që të hyjë në Kukës këtë të premte. Me anë të një postimi në rrjetet sociale, Pepkolaj shprehet se nëse do të bëhej diçka e tillë, do të ishte veprim historik.
“Do ishte ky, nje veprim historik qe do u jepte burrave te Kukesit, pa me te voglin dyshim vlersimin maksimal ne rang kombetar e me gjere, si kontributoret me te devotshem te demokracise..”, – shprehet Pepkolaj.
Më tej ai shprehet: “E nese vertete faktori politik do ishte i gjithi i bashkuar per ta zbythur ate mortaje atehere ky do ishte leksioni me i mire i funksionimit te demokracise qe i jepet qytetarise Shqiptare nga burrat Kuksiane..!”
Postimi i Shkëlqim Pepkolajt
Kryeministri Edi Rama, pritet të zhvillojë këtë të premte një vizitë në Kukës, ku do të inaugurohen fillimet e punimeve për rikonstruksionin e aeroportit të Kukësit. Lajmi u bë i ditur nga kandidati për kryetar të Bashkisë Kukës, njëherë president i klubit të futbollit të këtij qyteti, Safet Gjici. (Lexo këtu)
Shkëlqim Pepkolaj është ish-nëndrejtori i Policisë së Kukësit, i cili zbuloi të gjithë procedurën e paligjshme me të cilën, prokuroria dhe Policia e Kukësit liruan një supertrafikant të kërkuar droge, Naser Gashi. Pas kësaj ai vendoi të largohej për azil politik.
Si ndodhi skandali?
Në 17 tetor të 2018-ës, Naser Gashi i shoqëruar nga Ron Nimani tenton të dalë nga Shqipëria përmes pikës kufitare të kalimit të Morinës.
Në një makinë tip Audi me dokumente të falsifikuara që mbanin emrin e Saimir Bula, Gashi tentoi të largohej. Por pas dyshimeve për dokumentet, policia e shoqëroi në Drejtorinë e Policisë ku iu bë identifikimi përmes gjurmëve të gishtave.
Pas identifikimit në Komisariat u zbulua se nuk ishte Saimir Bula por Nazër Gashi. Dhe këtu nis që historia të marrë rrjedhë.
Prokurorja Rita Gjati firmosi lirimin e menjëhershëm, që u ekzekutua nga policia në 18 tetor. Policia e Kukësit e fshehu ngjarjen duke mos dhënë asnjë njoftim për mediat. “Kurbani” i vetëm i kësaj historie u bë denoncuesi, polici Shkëlqim Pepkolaj që u pezullua nga detyra pasi hetoi procedurën e paligjshme të policisë së Kukësit.
Pasi ngjarja u bë publike, prokuroria e Përgjithshme reagoi duke thënë se Naser Gashi nuk duhet të lirohej, ndërkohë që Krimet e Rënda dhe organet e tjera shtetërore nuk kanë dhënë më asnjë informacion se çfarë do të bëhet me hetimin dhe vënien para përgjegjësitë të prokurores, që e dinte kë po lironte dhe oficerëve që liruan supertrafikantin e dënuar me 7.4 vite burg. Krimet e Rënda e kanë nisur hetimin për këtë çështje në 30 janar 2019.
