Pavarësisht se nga janari i këtij viti të gjitha bastet dhe lojërat e fatit u mbyllen me ligj, duket se mbyllja ka qenë thjeshtë diçka e pjesshme, pasi shumë kompani po e vazhdojnë aktivitetin e tyre. Nga njëra anë ambientet ku më parë zhvillohej aktivitet i kazinove elektronike apo basteve sportive, nuk janë mbyllur, në kuptimin e plotë të fjalës. Ekspertët e pasurive të paluajtshme sqarojnë se një pjesë e mirë e tyre po mbahen sërish me qira nga ata që i kanë pasur, një pjesë e vogël janë hedhur në treg, ndërsa llotot sportive janë transformuar në biznese shërbimesh.
Nga ana tjetër, në Shqipëri janë të paktën rreth 10-15 pika bastesh online që e vazhdojnë pa ndërprerje punën pavarësisht mbylljes me ligj të këtij aktiviteti që nga 1 janari i këtij viti. Sipas dëshmive të atyre që punojnë në këtë biznes, mësohet se këto kompani vetëm kanë ndryshuar emrin. Sipas tyre aktiviteti nuk është ndërprerë asnjë ditë, por tashmë luhet kryesisht në celular dhe kompjetera. Gjithçka bëhet me lek në dorë, në ambiente kafenesh rrugë apo bare.
Po ashtu, duket se bixhozi ka vendosur të marrë një tjetër formë, disi më të fshehtë e të sofistikuar në mënyrë që të sigurojë mbijetesën e vet. Një ndër skemat që po përdoren është ajo e licensimit në vendet evropiane duke hapur faqe online të cilat operojnë në Shqipëri nën maskimin e kafeneve. Përpos eksodit masiv të tyre në vendet fqinje, mësohet se kjo skemë maskimi është ndër më të përdorurat pas vendimit të qeverisë për të mos lejuar më aktivitete të tilla.
Një sërë kompanish kanë hapur licensa në vendet europiane, ndërsa operimin dhe shitjet i bëjnë online ne vendin tonë me anë të një user-i të thjeshtë, të cilin ia sigurojnë të gjithë atyre që duan të luajnë. Këta lojtarë mund të jenë individë ose një prej pikave që deri dje ka funksionuar me NIPT sekondar, si pikë basti, por që sot ka hequr logot e kompanive që përfaqësonte dhe është regjistruar në sajtet online të kompanive jashtë vendit ku përmes një username specifik vijon aty aktivitetin e rregullt.
Mënyra e funksionimit të kësaj skeme për lojërat online është e tillë: kompania X e licencuar jashtë Shqipërie në baste sportive ka të regjistruar në sistemin e saj pika sekondare, që funksionojnë si nën një NIPT aktiv si kafene në Shqipëri. Administratori i kafenesë regjistrohet në faqen online të kompanisë së basteve, duke marrë një username dhe duke regjistruar një kartë krediti të vlefshme, por nga e cila nuk kryhen kurrë transaksione. Paratë, në fakt, vijnë nga llogari bankare të hapura në banka të huaja, jashtë Shqipërisë.
Paratë në këtë rast, pjesa e shumave të vogla që paguhen, nuk regjistrohet askund, kështu, nga ana e shtetit nuk mund të taksohet asgjë, pasi nuk figuron kund. Këto kafene të maskuara tashmë i janë larguar disi imazhit të qendrave të bastit, por gjithsesi në to ka sërish televizorë ku luhen ndeshje, por që për tu treguar të kujdesshëm, rezultatet mund të shihen online vetëm përmes celularit.
Ndonëse u prit një reagim i fortë pas dhe ndikim i fortë pas mbylljes së basteve, një gjë e tillë nuk ndodhi, me shumë mundësi, pasi pjesa dërrmuese e këtyre kompanive po e zhvillojnë punën e tyre në të zezë, duke ftuar të apasionuarit dhe të varur pas bixhozit, ndërsa qeverisë duket se i ka mjaftuar dukja dhe shoë mediatik, por jo çrrënjosja e vetë fenomenit. /Atlasi.al.
