Ardi Veliu drejtori i Përgjithshëm i Policisë ka qenë i ftuar në emisionin ‘A Shoë’ të Adi Krastës ku ka folur në lidhje me ngjarjet e fundit që po ndodhin në vend.
Ai ka paralajmëruar edhe ndryshime të tjera, ku radhën e ka Elbasani.
Ju kujtojmë që para pak ditësh në Elbasan u vra avokati Ravik Gurra.
“Ajo që ndodhi në Shkodër është një ngjarje e rëndë, pavarësisht masave të marra. Policia atje gjatë 2018 ka qene shumë prezentë, është një nga qarqet ku ka ndërthurje të grupeve kriminale dhe fenomenit të gjakmarrjes. Nëse i referohem statistikave dua të jem konkret. Themi situatë të rënduar por përqindja e veprave penale të evidentuar në Shkodër në 2018 është vetëm 7%, krahasuar me gjithë Shqipërinë. Drejtori lëvizi për shkakun se duam t’i japim një impuls tjetër, për një ritëm tjetër. Do bëjmë edhe ndryshime të tjera, edhe në Elbasan. Duhet kohë për të goditur grupet kriminale dhe ne I kemi të gjitha kapacitetet e duhura për të kontrolluar situatën kriminale”, është shprehur numri një i Policisë së Shtetit, Ardi Veliu.
Ditën e sotme u largua nga detyra edhe shefi i Komisariatit të Policisë Shkodër, Vasil Çela, i zëvendësuar nga Lorenc Meta.
