Krimet e Rënda rrëzuan ankimin e ish-kryeprokurorit Adriatik Llalla, i cili kundërshtoi në gjykatë kërkesën e prokurorisë për zgjatjen e hetimeve ndaj tij.
Gjykata e Krimeve të Rënda pranoi kërkesën e Prokurorisë duke vendosur zgjatjen me 3 muaj të hetimeve ndaj ish-kryeprokurorit Adriatik Llalla. Pas kësaj, Llalla ankimoi vendimin, që nuk ka bindur gjykatën, duke e hedhur poshtë.
Akuza ndaj Llallës përfshijnë veprat penale “refuzim për deklarim, mosdeklarim, fshehje ose deklarim i rremë i pasurisë, interesave private të të zgjedhurve dhe nëpunësve publikë”, “mosdeklarim të shumave monetare në kufi”, “pastrim të produkteve të veprës penale” dhe “shpërdorim detyre”.
Në korrik 2018, Gjykata e Krimeve të Rënda, me kërkesë të prokurorisë sekuestroi pronat e ish-Prokurorit të Përgjithshëm. Në një njoftim për shtyp, Prokuroria e Krimeve të Rënda bëri të ditur se Llallës iu vendosën nën sekuestro një apartament 67 metra katrorë në Durrës dhe katër parcela toke me sipërfaqe të përgjithshme prej rreth 22 mijë metrash katrorë.
“Si rezultat i veprimeve hetimore të kryera, janë krijuar dyshime të arsyeshme se disa pasuri të paluajtshme në zotërim të shtetasit Adriatik Llalla përbëjnë produkt të veprës penale,” deklaroi prokuroria.
Hetimi ndaj Llallës u regjistrua fillimisht nga Prokuroria e Durrësit më 15 mars 2018 nën akuzën e fshehjes së pasurisë, shpërdorimit të detyrës dhe pastrimit të parave. /BN/
https://www.facebook.com/boldnews.al/videos/2124297670996833/?v=2124297670996833
