Goditja me shishe kokës e vijërojtësit Nertil Bregasi i ka kushtuar shumë shtrenjtë Tiranës, që sheh t’i mbyllet stadiumi nga Komisioni i Disiplinës për 4 ndeshjet e radhës si pritës. Një vendim i rëndë ky, për një ngjarje të rëndë, por që nuk është i barazvlefshëm me ngjarje të tjera të ngjashme këtë vit në Superiore, si ajo e Kukësi-Laçi po në fillimin e këtij viti, ku anësori Denis Rexha u godit në kokë nga tifozët, por verilindorët u ndëshkuan vetëm me gjobë prej 200 mijë lekësh.
Disiplina sot ka dhënë edhe vendimet e tjera për ngjarjet pas sfidës Tirana-Laçi, duke ndëshkuar me 5 ndeshje pezullim Majkëll Ngo për sulm ndaj kundërshtarit dhe zëvendëstrajnerin Egbo me dy ndeshje për protesta. Ndërkohë, nuk i ka shpëtuar pezullimit as presidenti i Laçit, Pashk Laska, djali i tij Kleo Laska, si dhe zv.trajneri Hima.
Duket e çuditshme që asnjë prej të tjerëve të përfshirë në zënkë, ku janë goditur shumë lojtarë të dy skuadrave, nuk figuron i dënuar nga Disiplina, e cila ka dashur ta mbyllë pa shumë telashe të tjera për dy skuadrat këtë ngjarje të turpshme.
Vendimi i Komisionit të Disiplinës së FSHF datë 01.04.2019
- KF “Tirana”, për sjellje të gabuar të spektatorëve duke shkaktuar ndërprerjen e përkohshme të lojës, në bazë të Nenit 66/3/b të KDS, dënohet me zhvillimin e 4 (katër) ndeshje pa spektatorë në stadiumin përkatës.
- Lojtari i KF “Tirana”, Michael Ayodeji Ngoo, për sulm ndaj kundërshtarit të ndeshjes, në bazë të Nenit 48/1/e të KDS, dënohet me 5 (pesë) ndeshje pezullim nga aktivitetet.
- Zyrtari i KF “Tirana” , Emanuel Egbo , për protesta ndaj vendimeve të zyrtarit të ndeshjes, në bazë të Nenit 56/1/a të KDS, dënohet me 2 (dy) ndeshje pezullim nga aktivitetet.
- Zyrtari i KF “Laçi” , Pashk Laska, për sjellje jo sportive ndaj kundërshtarit të ndeshjes, në bazë të Nenit 48/2/a të KDS, dënohet me 3 (tre) ndeshje pezullim nga aktivitetet. Në bazë të nenit 20 dhe 21 të KDS, zyrtarit i ndalohet hyrja në stadium, në dhomat e zhveshjes dhe territoret përreth fushave të lojës apo stolat e rezervave.
- Zyrtari i KF “Laçi”, Kleo Laska, për sulm ndaj kundërshtarit të ndeshjes, në bazë të Nenit 48/2/b të KDS, dënohet me 9(nëntë) ndeshje pezullim nga aktivitetet.
- Zyrtari i KF “Laçi”, Klevis Hima, për sulm ndaj kundërshtarit të ndeshjes, në bazë të Nenit 48/2/b të KDS, dënohet me 9(nëntë) ndeshje pezullim nga aktivitetet.
- FK “Partizani”, paralajmërohet se në rast përsëritje të sjelljes së gabuar të spektatoreëve do të jetë subjekt i masave ndëshkimore që parashikon Kodit i Disiplinës Sportive dhe rreglloret e tjera të FSHF.
- KF “Vllaznia”, paralajmërohet se në rast përsëritje të vonesave në fillimin e lojës do të jetë subjekt i masave ndëshkimore që parashikon Kodit i Disiplinës Sportive dhe rregulloret e tjera të FSHF.
- Zyrtari i KF “Shënkolli” , Albert Rrusti, për protesta ndaj vendimeve të zyrtarit të ndeshjes, në bazë të Nenit 56/1/a të KDS, dënohet me 2 (dy) ndeshje pezullim nga aktivitetet.
- Zyrtari i KF “Vora”, Rezart Maho, për protesta ndaj vendimeve të zyrtarit të ndeshjes, në bazë të Nenit 56/1/a të KDS, dënohet me 2 (dy) ndeshje pezullim nga aktivitetet.
