Nga Boldnews.al
Në postimin e fundit në profilin e tij në Facebook, Erion Veliaj lajmëroi se 20 studentë ekselentë kanë nisur praktikën në Bashkinë e Tiranës.
“20 studentë nisin praktikën e punës në Bashkinë e Tiranës. Bashkë me Ministrinë e Arsimit, do nisim punën për Kartën Studentore Bashkiake, ndërkohë që Këshilli Bashkiak tashmë i ka marrë vendimet për 40 shërbime, që gjithsesi edhe sot ofrohen me kosto më të ulët për studentët”-shkruan Veliaj.
Nisma për të punësuar studentët ekselentë ishte një “gjetje alla Rama”, që i ndodhur ngushtë përballë revoltës masive, u premtoi se do të hapte dyert e administratës shtetërore për ta. Si gjithnjë, Lali Eri për çështje propagande “shet” edhe kullën e sahatit, jo më të mos “blejë” një grup studentësh.
Të rinjtë janë në të drejtën e tyre krejtësisht morale dhe legjitime për të aplikuar për punë në administratën shtetërore, për aq kohë sa plotësojnë kriterin me mesatare mbi 9. Por mbi njohuritë e tyre po abuzojnë zyrtarët e lartë.
Studentëve po u ofrohen vende pune në rolin e specialistëve, pa u lënë mundësi karriere, pasi shefat më lart, janë Rilindas që diplomën e shkollës së lartë e kanë marrë me shumë “mund” duke e blerë në “byrektoret e universiteteve private”.
Por Lali Eri që sot nuk lë rast pa propaganduar se po punon për përmirësimin e kushteve akomoduese të studentëve, nuk ka zbatuar ligjin, specifikisht për çështjen e realizimit të kartës studentore.
Që nga viti 2015 karta e studentëve u përfshi në Ligjin e Arsimit të Lartë dhe për realizimin e saj ngarkohej Bashkia, por pas katër vitesh në krye të bashkisë, Lali Eri nuk e ka mbajtur këtë premtim. Një nga tetë kërkesat gjatë protestës së studentëve në dhjetor të vitit të kaluar ishte edhe pajisja me kartë studenti, e cila thuhej se do të realizohej brenda gjashtë muajve nga momenti që ligji hynte në fuqi.
Kjo do i jepte më shumë lehtësira në shërbimin e transportit urban, në bibliotekë, për probleme shëndetësore dhe shërbime të tjera që kategoria e studentëve duhet ti merrte falas ose me kosto të ulët.
Ndërsa kjo pikë ishte “ekskluzivitet i Bashkisë”, Erion Veliaj që nuk lë ditë pa zaptuar mediat heshti, duke ia kaluar barrën qeverisë, me shpresë se ajo revoltë do i shkurtonte ditët Edi Ramës. Sot që Lali është rikandituar për bashkinë dhe Rama përçau protestën e studentëve, të dy këta personazhe kanë nisr një propagandë të ulët, duke shfrytëzuar të rinjtë ekselentë që u ofrohet një vend pune i rëndomtë në administratën e zezë shtetërore, ku korrupsioni dhe nepotizmi janë tashmë “vlera” të Rilindjes.
