Kryeministri Edi Rama, nga foltorja e parlamentit, bëri një ‘lapsus’, ndoshta me qëllim, teksa u shpreh se “Niçja” (i Shijakut) është shoku i ish-deputetit të PD-së Ervin Salianji.
“Sot Shqipëria është një vend shumë më i sigurt se pesë vite më parë edhe pse diskutohet rregullisht pa pushim në të gjitha klubet mediatike. Një mori episodesh me lajme pa lajm që ziejnë dhe arrijnë pikët e vlimit kur shfaqet Babalja dhe Nicja e Shijakut, apo shoku i tyre i pandashëm Ervin Salianji”, tha Rama.
Kreu i qeverinë, në fakt, harron, apo ndoshta bën sikur (kjo e fundit me shumë gjasë) se Niçja i Shijakut është shoku i kryebashkiakut të Durrësit të zgjedhur prej tij, Vangjush Dako. Miqësinë mes Dakos dhe Niçes e kanë faktuar edhe përgjimet e prokurorisë, në dosjen e shumëpërfolur “339”.
Përgjimet e publikuara në media kanë treguar se Dako darkonte me Niçen dhe fliste për blerje votash. Jo vetëm kaq, por miqësia mes tyre ishte aq e ngushte saqë anëtarët e bandës së Shijakut, e kishin pagëzuar me një tjetër emër kryebashkiakun e Durrësit: “Xhuxhi”.
Megjithatë, kryeministrit Edi Rama nuk i intereson të flasë për këtë miqësi. Për atë, ashtu siç e shprehu edhe në vijim të fjalimit të tij të gjatë në parlament, për shumëçka që shkon keq në këtë vend, e ka fajin opozita. /Boldnews.al/
