Pas armëpushimit vjen edhe paqja. Mauro Icardi nuk është më një problem për Interin, madje mund të kthehet sërish në një zgjidhje për skuadrën zikaltër dhe trajnerin Luciano Spalletti, në emergjencë dëmtimesh në prag të sfidës së rëndësishme të së dielës kundër Lacios. Sulmuesi argjentinas prej një jave është bashkuar në stërvitje me ekipin, por vetëm në seancën e së enjtes u përgatit me ekipin e plotë, pas rikthimit të lojtarëve të tjerë që ishin impenjuar me kombëtaret respektive.
Si shenjë se gjithçka i përket së shkuarës, Icardi mbajti një fjalim para shokëve të tij dhe stafit teknik, veprim ky që mund të përshpejtojë edhe rikthimin e tij në fushën e lojës. Kjo zgjedhje nuk është shumë e dashur për Luciano Spallett, por gjithsesi e detyruar për teknikun zikaltër që në prag të sfidës direkte për Champions e sheh veten pa sulmues.
Lautaro Martinez është kthyer i dëmtuar nga grumbullimi me kombëtaren e Argjentinës dhe ka pak shanse që lojtari, i cili ndihmoi Interin gjatë momentit më të vështirë, të jetë gati për ndeshjen kundër Lacios. Po ashtu, një tjetër mungesë e rëndësishme për zikaltërit është edhe De Vrij, me mbrojtësin që u dëmtua gjatë grumbullimit me kombëtaren e Holandës.
