Ka kushtuar 48 milionë euro dhe është një vilë super luksoze, por duhet të prishet brenda 18 muajve.
Ky është vendimi i një gjykate franceze, pas një beteje të gjatë gjyqësore.
Vila e ndërtuar në rivierën franceze, mes Monakos dhe Kanës, duhet të prishet, pasi është pa leje.
Pronari pasanik i vilës, Patrick Diter, e ka ndërtuar atë në vitin 2005 në një zonë pyjore të mbrojtur, pa pritur më parë të marrë lejen e nevojshme.
Por, fqinjët e pasanikut, me në krye një çift britanik, ngritën padi, me arsyetimin se vila është ndërtuar në një zonë të mbrojtur dhe për më tepër dëmtonte pronat e tyre.
Biznesmeni francez e lëshonte banesën e tij me qira për 50 mijë euro në ditë dhe ajo frekuentohej për festa, nga njerëz të famshëm.
Diter është gjobitur me 400 mijë euro dhe tre muaj burg të pezulluar dhe nëse nuk e shemb godinën brenda 18 muajsh, do përballet me gjobë prej 600 eurosh çdo ditë që kalon.
