Vllaznia zyrtarizoi ditën e djeshme Agim Canajn në krye të pankinës, pas largimit të Hasan Likës. Në prononcimin e tij të parë për mediat, tekniku vlonjat foli për aventurën e tij të re, teksa zbulon se e pranoi pa kushte në aspektin profesional propozimin që iu bë.
“Asnjëherë nuk i kam thënë “jo” Vllaznisë sa herë ka pasur nevojë. Është një dëshirë e hershme e imja. Unë jam ndjerë shumë mirë si trajner edhe në marrëdhëniet me njerëzit. Edhe kësaj radhe e pranova pa kushte në aspektin profesional propozimin që mu bë.
Kemi nevojë për punë, çdo gjë arrihet me punë dhe unë jam i gatshëm të jap të gjithë eksperiencën time, për të arritur objektivin kryesore, ngjitjen në Superiore edhe për të arritur edhe pikën kulmore që është Kupa.
Duhet shumë punë. Të flasësh për një të ardhme duhen disa piketa, në radhë të parë duhet buxheti. Ne po shohim ekipe në Superiore që kanë buxhet dhe janë të hapur objektivat për titullin kampion”, u shpreh Canaj.
