Policia e Tiranës u përfshi nga ndryshimet ditën e sotme, ku pas emërimit të Rebani Jaupajt në krye të uniformave blu, pasi një lëvizje edhe në rradhët e shefave të komisariateve.
Një ndër komisarët që u ndryshua ishte edhe Pal Marku, i cili drejtonte komisariatin nr 6 të Policisë së Tiranës.
Burime policore bëjnë të ditur se Marku kishte kërkuar ndryshimin për shkak të përplasjeve që kishte me drejtuesit e Policisë së Shtetit, por edhe Ministrisë së Brendshme, lidhur me menaxhimin e protestës në Unazën e Re. Duket se Marku nuk ka qenë dakort me ndonjë udhëzim që parashikon moslejimin e banorëve për të protestuar, çka ka çuar në përplasjen mes tij dhe drejtuesve të policisë.
Komisariati nr 6 mbulon edhe këtë zonë, ku prej 140 ditësh banorët protestojnë kundër një projekti të qeverisë, që parashikon shembjen e banesave dhe zgjerimin e rrugës.
Marku ishte emëruar në krye të Komisariatit nr 6 në qershor të 2018, ndërsa më parë ka drejtuar Policinë e Burgjeve.
Marku mësohet se është transferuar në Drejtorinë e Përgjithshme të Policisë së Shtetit, ndërsa në vend të tij është emëruar Ardrit Elmazi. Ky i fundit së fundmi ka qenë shefi Komisariatit nr 3, ndërsa më parë ka mbajtur funksionin e Luftës Kundër Krimit të Organizuar në Policinë e Tiranës, si dhe ka drejtuar komisariatin e Policisë në Fier. /Boldnews.al/
