Kreu demokrat Lulzim Basha u ka kërkuar ish-deputetëve dhe anëtarëve të Kryesisë së PD-së që të shpërndahen në zona të caktuara për të protestuar sipas problematikave, në krah të qytetarëve.
Burime nga PD bëjnë të ditur se në mbledhjen e zhvilluar në selinë e PD-së, Basha është shprehur se çdo javë degët dhe strukturat e partisë, përfshi edhe të deleguarit sipas zonave, duhet të mblidhen dhe të jenë në krah të qytetarëve, në protesta, por jo vetëm, edhe për prezantimin e programit të kësaj force politike.
Mësohet se në mbledhje është vendosur zhvillimi i protestave para Kuvendit, sa herë të ketë seancë plenare, ndërsa anëtarëve të kryesisë u është kërkuar të jenë më aktivë dhe më të angazhuar në protesta.
Burime nga PD theksojnë se anëtarët e Kryesisë dhe ish-deputetët, të deleguar sipas zonave, do të bashkërendojnë agjendën me strukturat lokale, por edhe me partitë aleate, për organizimin e takimeve dhe protestave me qytetarët apo me grupet e interesit.
“Protestat në rrethe të organizohen sipas problematikave, takohuni dhe diskutoni me qytetarët mbi problemet që kanë”, ishte një tjetër porosi e kreut demokrat.
