Kreu demokrat Lulzim Basha pritet të paraqitet sot në Prokurorinë e Tiranës lidhur me dosjen e lobimit në SHBA.
Prokuroria ka thirrur Bashën në orën 09:00.
Organi i akuzës e ka thirrur kreun e opozitës me cilësinë e personit që ka dijeni lidhur me dosjen.
Fletë-thirrja e parë drejtuar kreut demokrat ishte në datën 21 mars, ditë kur opozita protestonte para Kuvendit, ndërsa Basha ishte në Bruksel ku merrte pjesë në Samitin e PPE-së.
Bashkë me kreun e PD-së, Prokuroria ka thirrur edhe ish-Sekretarin e Përgjithshëm, Arben Ristani.
Prokuroria i ka në zyrën e saj prej 8 muajsh fashikujt e dosjes.
Prokuroria nisi verifikimet për kontratën e lobimit të PD me disa kompani amerikane në nëntor të vitit 2017. Objekt i këtij verifikimi është sqarimi i burimit të financimit për këto kontrata dhe skanimi i tyre për të parë nëse transaksionet kanë qenë të rregullta ligjërisht.
Kontrata e parë e lobimit ishte ajo mes PD dhe ‘Stonington Strategies’ me vlerë 25 mijë USD në muaj. Afati i kontratës ishte tre mujor dhe qëllimi i saj ishte ‘projektimi dhe implementimi’ i fushatës së PD.
Qëllimi i saj ishte promovimi i qëllimeve të PD në media dhe pranë figurave politike në SHBA.
Më pas PD bëri edhe një pagesë shtesë prej 500 mijë USD për sigurimin e disa takimeve ose pjesmarrje në evente në Uashington D.C.
Financimet në PD/ Zbardhet letra e Bashës dërguar Prokurorisë
