Nga Boldnews.al
Për një sistem më shumë se autoritar, në kufijtë e diktaturës, gjithnjë krijohen armiq, edhe kur ata nuk ekzistojnë. Dje, kryeministrit Edi Rama ia gjetën të dy “armiqtë” e pushtetit, të brendshëm e të jashtëm. Këtë “zbulim” e bëri kryeprokurorja Arta Marku, që nëpërmjet prokurorëve të urdhëruar prej saj, mbajtën për më shumë se një orë kryeopozitarin Lulzim Basha për çështjen e financimit të dyshimtë sipas akuzës në lotimin që PD ka bërë në Shtetet e Bashkuara të Amerikës.
“Jemi thirrur sot në Prokurori si persona që kemi dijeni për rrethanat e hetimit. Dua të bëj të qartë se hetimi i hapur prej 1 viti e gjysmë bëhet sipas nenit 190 për çështjen e plotësimit të formularëve të deklarimit në KQZ nëse janë mbushur siç duhet apo jo. Ky është hetimi, jo gënjeshtrat dhe shpifjet për të cilat qeveria i aktivizon sa herë i duhet për nevoja politike”-deklaroi Basha pas daljes nga prokuroria.
Prokuroria nisi hetimet pas shkrimit në revistën amerikane “Mother Jones” lidhur me fondet që kjo parti ka paguar për aktivitete lobimi në Shtetet e Bashkuara të Amerikës, para zgjedhjeve të qershorit 2017, ku nga hulumtimi i tyre dyshohej se kompania lotuese drejtohej nga biznesmenë rus.
Se çfarë lidhje kishte kjo me Shqipërinë, vetëm kryeprokurorja Marku dhe vartësit e saj mund të krijojnë një tymnajë, që në këtë rast shërben për të shkëputur vëmendjen nga problemet madhore të qeverisë. Kryeprokurorja e përkohëshme që tenton të jetë e përhershme, vetëm me një dosje, i “zbuloi” Ramës të ashtuquajturin grupin armiqësor të brendshëm, që në këtë rast është opozita dhe atë të jashtëm, që janë agjenturat e huaja me ndikim rus.
Është i kuptueshëm zelli i institucionit të akuzës që po tenton të hedhë një kamardare shpëtimi në lumin e rrëmbyeshëm që po vërtitet Rama. Kryeministri ndodhet në situatën e rëndë që po kalon vendi, me protestat e opozitës, largimet masive të njerëzve, në vetëm gjashtë vite qeverisje të tij janë larguar gjysëm milioni shqiptarë, ekonomi thuajse në prag katastrofe dhe varfëri të skajshme të 1/3 të popullsisë.
Në psikozën e liderëve autoritar me ngjyrime të forta diktatoriale gjithnjë nuk pranojnë kurrë vetë përgjegjësinë, por atë ua hedhin të tjerëve. Rama sot po qeveris i vetëm, i ka të gjitha pushtetet (edhe ata që konsiderohen të pavarura në letra) dhe e ka të pamundur që brenda suazës së tij të gjejë armiqtë që e pengojnë.
Në këtë mënyrë ata të “keqinjtë” e “pushtetit popullor” i ka sajuar jashtë radhëve të tij, madje edhe me ndikim nga jasht, që po pengoj ë Shqipërinë e begatë në udhën e drejtë të Rilindjes.
