Kryetari i Partisë Socialiste Edi Rama mbështeti sot rikandidimin e Erion Veliajt si Kryetar të BashkisëTiranë. Në një manifestim ku ra në sy kosto e lartë e organizimit, Rama dhe Veliaj këmbëngulën se në katër vitet e fundit Tirana ka ndryshuar “si nata me ditën”. Por një nga premtimet që Veliaj nuk e mbajti asnjëherë ishte ai “moratoriumit të ndërtimeve për të shpëtuar hapësirat publike”.
Si për ironi teksa ai deklaroi të shtunën rikandidimin, dy kompani të ndryshme vetëm 300 metra larg njëra-tjetrës rregulluan rrethimin e kantierëve të tyre të ndërtimit për dy kulla të tjera në qendër.
Kompania Edil-Al nisi punimet për ndërtimin e godinës 24 katëshe Eyes of Tirana përball me Bankën e Shqipërisë, lejen e së cilës Kryetari i Bashkisë e ka miratuar më 25 shkurt 2019. Ditën e shtunë kur ai fliste për suksesin e tij, punëtorë të kompanisë Arlis-Ndërtim rinovuan rrethimin që kishte më shumë se një vit që ndodhej aty.
Duke plotësuar edhe pjesët që nuk ishin vënë, zona që deri në maj të vitit 2016 ishte lulishte, tanimë do të kthehet në një kantier ndërtimi për një kullë të lartë. Henning Larsen e kishte projektuar që në vitin 2007, kohë kur Edi Rama e projektonte Tiranën sipas të ashtuquajturit plan francez, që i linte vend ndërtimit të shumë kullave në qendër. I njëjti plan ka vazhduar edhe me Erion Veliajn, edhe pse ai pati premtuar “moratorium”.
Më tutje në hyrjen veriore të sheshit të ri, kompania Geci shpkqë ishte dhe ndërtuese e Unazës së Vogëlngriti të shtunën rrethimin për të nisur punimet pas Hotel Tiranës. Një godinë 133 metra e lartë dhe me 33 kate do të ngrihet aty për të “zgjeruar kapacitetet e hotelit”.
Bashkia e kryetarit që do të rikandidojë, nuk e ka patur aspak problem t’i lëshojë kompanisë, jo vetëm lejen, por edhe tjetër hapësirë publike. Trotuari dhe një pjesë e lulishtes që u bë me projektin e sheshit të ri, tashmë janë brenda kantierit. Këndi përkrah semaforit aty pranë me rrethimin e bërë detyron,tashmë, kalimtarët dhe përdoruesit e biçikletave të ndajnë të njejtën korsi.
Përveç këtyre dy kullave të reja, po në qendër ka nisur që prej janarit ndërtimi i kullës Book Building pas Kullës së Sahatit. Ndërkohë po ndërtohet Garden Building në rrugën e “Kavajës”, West Residence pas ndërtesës së Presidencës dhe Kulla Pylli Vertikal 21 katëshe pas stadiumit të ri kombëtar.
Këto janë vetëm disa nga qindra lejet e ndërtimit që kryetari i tanishëm i Bashkisë ka miratuar duke tkurrur vazhdimisht hapësirat publike për qytetarët e Tiranës.
