Qendra e Shërbimeve Arsimore ka bërë publike listën e plotë të mësuesve që do të futen në provim shteti.
Sezoni XIII ka nisur këtë të hënë me mësuesit e Ciklit Fillor dhe Shkencave Sociale, ndërsa QSHA ka hartuar oraret e testimeve edhe për 784 mësues e tjerë, në pritje të licencës për të nisur kërkimin e një pune.
Gazeta boton listën e dytë me 19 profile mësuesie, që do të futen në provim përgjatë dy javëve në vazhdim. Ata që gjejnë emrin më poshtë, duhet të paraqiten në ambientet e reja të QSHA-së, në bulevardin “Zhan D’ark”, në datën e caktuar, gjysmë ore përpara, të pajisur me dokumentet identifikuese, diplomat e dy cikleve dhe faturën e pagesës në bazë të herës së pjesëmarrjes në provim (të vulosur nga banka përkatëse).
Këtë vit, ndryshe nga më parë, qeveria ka bërë një lëshim për mbetësit. Ndryshe nga më parë, kur kandidatët për mësues testoheshin deri në pesë herë (nëse nuk e merrnin provimin, konsideroheshin të paaftë), tashmë ata mund të futen në provim edhe mbi këtë limit.
Mjafton të paguajnë një tarifë që vjen në rritje për herën e pjesëmarrjes që ata të sigurojnë kurdo licencën që iu jep të drejtë të kërkojnë një punë, qoftë në shkollë publike apo private. Vetëm këtë sezon testohen afro 1200 mësues të të gjitha profileve të mësuesisë. Atyre që u ka mbetur ende pak kohë për t’u paraqitur në provim mund të ushtrohen me aplikacionin e testeve të ngjashme në faqen e Qendrës së Shërbimeve Arsimore.
