Në mbyllje të Kongresit të Partisë Socialiste, fjalën e mbajti kreu i grupit parlamentar socialist, Taulant Balla, i cili foli edhe njëherë për arritjet imagjinare të Rilindjes në këto 6 vite.
I pyetur në fund nga gazetarët e pranishëm se si do i garantojë PS opozitën se nuk do të vjedhë votat në zgjedhjet lokale, Balla tha se përgjigjen e ka dhënë vetë kryeministri, i cili deklaroi se opozita duhet të fitojë një bashki më shumë se mazhoranca që tu plotësojë kërkesat e tjera.
Por Taulant Balla harron se vota e lirë dhe zgjedhjet e lira janë detyrim kushtetues dhe jo kapriço e qeverisë apo lëmoshë që qeveria i jep opozitës dhe qytetarëve shqiptarë.
Ndërkohë që Balla nuk i është përgjigjur as pyetjeve të bëra për ngjarjen e një nate më parë, ku avokati i njohur Ravik Gurra u ekzekutuar në qendër të qytetit të Elbasanit.
Ja pyetjet dhe përgjigjet:
Pyetje: Zoti Balla homologu juaj në Partinë Demokratike, zoti bardhi tha se nuk kanë garanci se ju nuk do ti vidhni zgjedhjet. Si mund ta garantoni ju zotin bardhi se nuk do ti vidhni zgjedhjet?
Balla: Ftesa jonë për opozitën për të marrë pjesë në zgjedhje ishte shumë kuptimplotë. Të marrë pjesë në zgjedhjet vendore, dhe nëse marrin një bashki më shumë se ne, ne jemi të gatshëm të përmbushim kërkesat e tjera të opozitës.
Pyetje: Zoti Balla, ju jeni dhe deputet i qarkut të Elbasanit, keni gjë për të thënë për vrasjen e djeshme?
Balla: Unë përgjigjen time e dhashë sot në kongres.
