Dhoma e Avokatisë në Elbasan në shenjë protestë do bllokojë për tre ditë të gjitha çështjet gjyqësore. Vendimi është marrë pas ekzekutimit në një lokal në qendër të qytetit të avokatit Ravik Gurra.
Vendimi i tyre është mbështetur edhe nga kreu i Dhomës së Avokatisë, Maks Haxhia i cili u shpreh se ditën e hënë do të shqyrtojnë mundësinë e bojkotimit të të gjitha proceseve nga një deri në tre ditë në shenjë proteste.
Ai tha se avokati Ravik Gurra është vrarë për shkak të detyrës, ndërsa fajësoi edhe politikën për gjendjen e krijuar në vend.
Gurra, mbrojtës ligjor i Emiljano Shullazit apo fisit Çapja, u vra me armë zjarri me silenciator, krim që tronditi qytetin.
Dëshmitarët në vendin e ngjarjes thanë se avokati Gurra ka ndërruar jetë menjëherë për shkak të plagëve të marra.
Në orët e mbrëmjes, qyteti I Elbasanit u vu nën kontrollin e trupave speciale të RENEA, që të ndihmuar nga policia lokale, ushtruan kontrolle në disa zona të qytetit, por edhe në pikat hyrëse dhe dalëse.
Raportohet se policia ka shoqëruar dhjetra persona që janë pyetur lidhur me ngjarjen e rëndë.
