Ekzekutimi me silenciator i avokatit Ravik Gurra, mbrëmjen e së premtes në Elbasan, ka tronditur qytetin, por edhe Dhomën e Avokatisë, e cila pritet që në 3 ditët e ardhshme të bllokojë zhvillimin e seancave gjyqësore në shenjë proteste.
Avokati u ekzekutua në një lokal në qendër të qytetit, në prani të dy miqve të tij. Autori dyshohet se ka përdorur një armë pistoletë, ndërsa avokati është qëlluar në kokë.
Nga hetimet, mësohet se autori i maskuar, është afruar te tavolina ku ishte Ravik Gurra, 50 vjeç, dhe e ka qëlluar nga pas, me dy plumba në kokë. Avokati ka humbur jetën menjëherë, ndërsa autori është larguar qetësisht.
Burimet bëjnë me dije se dyshimet janë që autori është larguar me një automjet tip Mercedez, që u gjet i djegur.
Policia ka sekuestruar pamjet filmike të disa bizneseve me shpresën që mund të arrijë në identifikimin e autorit të krimit.
Avokati ishte babai i dy vajzave, ndërsa banesa e tij ishte shumë pranë vendit të krimit.
Ndërkohë, Elbasani është vendosur në kontrollin e forcave RENEA, që kanë bërë disa shoqërime.
Mes personave të shoqëruar me cilësinë e dëshmitarit në krim janë edhe Arben Hoxha, jurist në Bashkinë e Elbasanit dhe Astrit Telhallari. Të dy këta shtetas ishin në tavolinë me viktimën.
Ndërkohë në pyetje janë marrë miq, të afërm dhe familjarë të viktimës. Mësohet se nga dëshmitë e tyre nuk rezulton se avokati të ketë pasur shqetësime apo kërcënime. Hetimet janë përqëndruar në pistën e vrasjes për shkak të detyrës.
Avokati ishte mbrojtës ligjor i Emiljano Shullazit, por edhe “Çapjave”.
