Nga Boldnews.al
Agjitpropi komunist nuk ka fund, ai ka ndërruar vetëm emër, që tani nga Rama, Veliaj dhe Fug-sat e tij quhet piar. Në këtë frymë po tentohet të mposhtet zëri i protestave. I ngjashëm me vitet e fundit të sistemit komunist, me lule, parada dhe kongrese për Partinë, edhe pse populli ishte në kërcënimin e urisë dhe nën diktaturë.
Neser kryeministri Edi Rama dhe drejtuesit e tjerë kanë thirrur Kongresin e Partisë Socialiste, ku pritet të diskutohet, ose më saktë “monologohet” nga Rama, për zgjedhjet lokale të 30 qershorit dhe kandidatët që do përfaqësojnë siglën e PS-së në 61 bashkitë e vendit.
Gjithçka do mbahet nën një shoë të madh, me propagandë, deklarata për arritje në “Pllanet 5-vjeçare” dhe kërcënimin se do i fitojë të gjitha bashkitë. Kjo do zgjasë gjithë paraditen e nesërme, ndërsa nga mesdita e në vijim, çiraku i ustait të madh, Erion Veliaj, do i ftojë kongresmenët dhe qytetarët të brohorasin “elitën politike” apo Byronë e sotme të qeverisjes.
Të jeni të bindur. Salla do jetë plot, kongresmenët po bëjnë përgatitje edhe për mënyrën si do duartrokasin njëhersh për të krijuar edhe audio “mbresëlënëse” përveç imazhit. Sheshi që mban emrin e shenjtores “Nënë Tereza” do jetë i mbushuar me “shenjtanët” e administratës shtetërore, që edhe ata nesër si kriter për të mbajtur vendin e punës kanë që veç vetes të sjellin edhe dhjetë të tjerë.
Gjithë fisit do i bien në qafë për të shtrënguar radhët dhe pse jo të mbërrijnë grupe grupe për të treguar se e kanë realizuar, e madje tejkaluar planin që kërkon partia. Imagjinoni që të gjithë të punësuarit në Tiranë, në bashki dhe institucionet e tjera përveç pjesëmarrjes së detyrueshme të tyre, duhet të sjellin me vete edhe dhjetë a më shumë të tjerë. Hareja e gazi do e mbulojë sheshin, (të mos ngatërrohemi, jo gazi lotsjellës i Lleshaj, sepse ai është ruajtur vetëm për opozitën).
“Grupi, si jeni? Ju lutem bëni konfirmimet me të punësuarit për nesër dhe të mos ketë asnjë të punësuar që nuk vjen nesër me të paktën 10 veta të tjerë nga pas, ose ndryshe do i kemi punët ndryshe me ju dhe me ata ka thënë vetë shefi i vogël se i duhet super imazh për nesër”. Kështu shkruan “i vogli” i shefave të mëdhenj, kreu i FRESSH-it Elio Hyskaj. Këtë mesazh e ka shpërndarë në grupin Whatsapp të FRESSH. Me presudonimin “shefi i vogël” bëhet fjalë për “madhin” Erion Veliaj.
Çmenduria ka arritur kulmin, por agjitpropi me rrënjë nga “partia mëmë” PPSH, sot përfaqësohet denjësisht nga Rama, Veliaj dhe shoqnia e tyre. Edhe në vitin 1989 festa e 1 dhe 5 Majit ishte madhështore, njerëzit detyroheshin të duatrokinin kastën politike. Një vit më vonë? Kasta u shemb dhe urrejtja ra mbi ta. Shefi i vogël po bën gafa të mëdha dhe trazon edhe më shumë revoltën e brendshme të qytetarëve. Gjithsesi, suksese në jetë, nesër e në vijim!
