Një ngjarje e rëndë ka ndodhur mbrëmjen e sotme në qytetin e Elbasanit, ku u ekzekutua me armë zjarri avokati Ravik Gurra.
Avokati është qëlluar në qendër të qytetit, pranë një lokali, ndërsa dyshohet se atentatori ka qenë i vetëm.
Pak minuta pas ngjarjes së rëndë, raportohet se një automjet është gjetur i djegur në dalje të qytetit të Elbasanit, duke ngritur dyshimet te policia, se ky automjet mund të jetë përdorur nga atentatori për t’u larguar.
Megjithatë, një tjetër informacion bën fjalë se atentatori është larguar në këmbë nga vendi i krimit, duke humbur gjurmët në zonën e kalasë.
Nga të dhënat e para mësohet se ndaj avokatit është qëlluar me armë me silenciator, ndërsa autori e ka qëlluar nga pas avokatin.
Hetimet për vrasjen e avokatit pritet të merren në dorë nga Krimet e Rënda, ndërsa dyshimet e para janë ato të krimit për shkak të detyrës.
50-vjeçari, një avokat me eksperiencë, njihej si mik i familjes Çapja, ndërsa ishte avokat i disa pjesëtarëve të kësaj familjeje në problemet që kanë pasur me drejtësinë.
Gjithashtu Gurra ishte avokat mbrojtës i Emiljano Shullazit, pork a qenë edhe avokat në gjyqin ndaj “Hakmarrjes për Drejtësi”. Gjithashtu Gurra ka qenë mbrojtësi i tre prej të akuzuarve në gjyqin ndaj sih krerëve të ARRSH për korrupsion në rrugën Elbasan-Tiranë.
Avokati është qëlluar teksa ishte në shoqërimin e dy personave të tjerë, njëri prej të cilëve është jurist i njohur në qytetin e Elbasanit.
