Vrasja e avokatit të njohur Ravik Gurra në qytetin e Elbasanit, ndodhi 90 minuta përpara nisjes së ndeshjes mes Shqipërisë dhe Turqisë, e vlefshme për Euro 2020.
Nëse i referohemi një historiku, sa herë ka ndeshje futbolli, veçanërisht të një rëndësie në Shqipëri është ekzekutuar një person.
Më poshtë po rendisim disa nga vrasjet e ndodhura gjatë ndeshjeve të futbollit.
Në 9 mars 2003, në një lokal në Lundër, në Periferi të Tiranës, u vra Fatmir Rama, i njohur ndryshe si Miri i Xhikes. Gjithashtu viktima në këtë atentat mbetën edhe Kristaq Cami dhe Julian Duriçi, i cili punonte si kamarier në lokal. Atentati ndodhi kur personat po shihnin ndeshjen e futbollit Shqipëri- Rusi që përfundoi me rezultatin 3-1.
Më 25 prill të vitit 2013, në Fushë Krujë, Florind Kadiu 19 vjeçar, u qëllua me thikë, gjatë ndeshjes së Ligës së Kampioneve Real Madrid-Borusia Dortmund.
Më 16 mars 2016, ditë kur vëmendja ishte në ndeshjet e Champions League, në qendër të Tiranës, në zonën e ish-bllokut u eliminua ish polici Ajet Zeqaj.
Më 14 shkurt 2018, në qendër të Tiranës, zona e ish-bllokut vritet biznesmeni Memli Begalla. Atë mbrëmje luheshin supersfidat e Champions League ku vëmendja ishte të Real Madrid-PSG që u mbyll 3 me 1.
Më 6 nëntor 2018, sërisht në një mbrëmje të Champions League, vritet Edison Harizaj, një emër i njohur i botës së nëndheshme të krimit në Vlorë. 39 vjeçari u qëllua për vdekje rreth orës 22.10 në vendin që njihet si Rruga e kanalit në Durrës në një atentat të mirëorganizuar. Pak orë më pas ndërroi jetë në spital edhe miku iu tij Genci Caca.
Më 22 mars 2019 vritet në qytetin e Elbasanit avokati Ravik Gurra, 50 vjeç. Autori ekzekutoi avokatin me një pistoletë me silenciator, 90 minuta para ndeshjes Shqipëri-Turqi.
