Nga Boldnews.al
Komisioni i Pavarur i Kualifikimit ka nisur hetimin për dy prokurorët e Tiranës, të cilët kanë hetuar çështjen “Babale”, Kolë Hysenaj dhe Genc Qana. Dy prokurorët janë pjesë e një liste të shortuar me 36 zyrtarë të sistemit të drejtësisë, të cilët do të kalojnë në filtrin e trefishtë të Vetingut-pasurinë, integritetin personal dhe aftësitë profesionale.
Prokurorët Qana e Hysenaj rezultojnë me pasuri të mëdha, të përbërë nga troje, apartamente, pjesa më e madhe e të cilave nga të ardhurat nga paga, por edhe dhurata dhjetra mijëra euro.
“Boldnews.al” ka raportuar edhe më parë për pasurinë e prokurorit Genc Qana, i cili u emërua zv.drejtues i Prokurorisë së Tiranës sapo mori në dorë hetimin e çështjes “Babale”.
Në bazë të deklaratave të pasurisë, të publikuara në portalin informativ “spendingdata.al”, prokurori Genc Qana rezulton të jetë pronar i tre apartamenteve, njërin prej të cilëve deklaron se ia ka dhuruar vjehrri. Vlera e kësaj dhurate llogaritet në rreth 100 mijë euro.
Gjithashtu, prokurori Qana rezulton të jetë pronar i 5 automjeteve. Gjithnjë duke iu referuar deklaratave të pasurisë, të dorëzuara prej tij në Inspektoratin e Lartë të Deklarimit e Kontrollit të Pasurisë dhe Konfliktit të Interesave (ILDKPKI), ai ka blerë automjetet në vite të ndryshme dhe nuk ka shënuar të ketë shitur asnjë prej tyre.
Kolegu i tij në çështjen “Babale”, Kolë Hysenaj, gjithashtu rezulton me një pasuri të ekzagjeruar. Por, ndryshe nga Qana, prokurori Hysenaj nuk ka marrë asnjë “dhuratë”. Pasurinë e tij ai e ka zgjeruar nga të ardhurat nga paga, si edhe fitimet nga një lokal i vogël, me 7-8 tavolina, që ka pranë Prokurorisë së Tiranës.
Prokurori Kolë Hysenaj, ka nisur jetën e tij familjare me një shtëpi të blerë në vitin 2001 me vlerë 2 milion lekë të reja. Pjesën më të madhe të shumës së paguar, ai e ka marrë borxh tek familjarët, rreth 1.5 milionë lekë të reja.
Por, sot, gjithnjë sipas deklaratave të pasyrisë, ai rezulton pronar i një toke 1000 m2 në Mullet, të cilat shënon se e ka blerë me vlerë 390 mijë lekë të reja, në vitin 2008.
Gjithashtu, gjatë kohës që ishte drejtues i Prokurorisë së Korçës (në vitet 2016-2017, prokuroi Hysenaj investon rreth 130 mijë euro në pasuri të paluajtshme në qendër të qytetit jug-lindor. Burimi kryesor i pasurisë së tij, shënohet të jetë të ardhurat nga paga, si edhe fitimet nga “biznesi i vogël”, lokali rreth 30 m2.
Prokurori Kolë Hysenaj ka qenë një ndër 100 zyrtarët që gjendeshin në “listën e zezë” të kryeministrit Edi Rama, në verën e vitit 2017. Në atë listë, kryeministri publikoi emrat e zyrtarëve, për të cilët kishte marrë denoncime për përfshirje në veprime korruptive.
Njëlloj si kolegu i tij Genc Qana, edhe prokurori Kolë Hysenaj u promovua në detyrë sapo mori në dorëzimin hetimin e çështjes “Babale”. Nga prokuror i thjeshtë në Tiranë, Kolë Hysenaj u emërua drejtues i Seksionit të Antitrafiqeve në këtë institucion.
Në tetor 2018, Genc Qana dhe Kolë Hysenaj u ngarkuan të hetonin personat e akuzuar për “kallëzim të rremë” ndaj Agron (Geron)Xhafaj, vëllai i ish-ministrit të Brendshëm, Fatmir Xhafaj, i dyshuar se vijonte të kryente trafikun e narkotikëve.
Në përfundim të hetimeve sipërfaqësore, Hysenaj e Qana vendosën të merrnin të pandehur denoncuesit, e konkretisht deputetin e sapo-dorëhequr të opozitës, Ervin Salianji, gazetarin Jetmir Olldashi dhe denoncuesin Albert Veliu.
Dy prokurorët nuk kryen asnjë hetim mbi dyshimet e përfshirjes së Agron (Geron) Xhafaj në trafikun e narkotikëve.
