Nga Boldnews.al
Arta Marku i parapriu kandidimit për postin e Prokurorit të Përgjithshëm me mandat të plotë, me një sulm të hapur ndaj kolegëve të saj. Gjatë analizës në Prokurorinë e Durrësit, Kryeprokurorja e Përkohshme e konsideroi pavarësinë e prokurorëve si një mundësi të artë për abuzim në kurriz të qytetarëve.
Ky qëndrim kundër pavarësisë së prokurorëve është në kundërshtim të plotë me frymën e Reformës në Drejtësi. Për Markun, mungesa e mekanizmave kontrollues ndaj punës së prokurorëve, i nxit ata të abuzojnë me detyrën, duke vijuar cënimin e imazhit të sistemit të drejtësisë.
Deklaratat e Arta Markut, të cilat janë në një linjë me sulmet e maxhorancës politike, kanë lënë një shije të hidhur tek një pjesë e madhe e prokurorëve. Këta të fundit tashmë janë nën presionin e vetingut, nën presionin e politikës dhe, së fundmi, edhe nga titullarja e institucionit, e cila ka detyrën që t’i mbrojë dhe përfaqësojë përballë shantazheve që vijnë nga jashtë sistemit të Prokurorisë.
Është e paqartë se ku bazohet Kryeprokurorja e Përkohshme në konstatimin se prokurorët “abuzojnë”. Ajo, në fjalën e saj iu referua rasteve të publikuara në kronikat mediatike, ndërkohë që u justifikua se nuk ka bazë ligjore për nisjen e inspektimeve ndaj prokurorëve.
Por, kjo deklaratë është në kundërshtim me veprimet e saj konkrete. Rreth 6 muaj më parë, Kryeprokurorja e Përkohshme urdhëroi nisjen e hetimit disiplinor për 10 prokurorë të Krimeve të Rënda, të cilët u përfshinë në një debat procedurial me drejtuesen e tyre, Donika Prela.
Në një fjalim drejtuar popullit në atë kohë, Arta Marku nuk e ngriti pretendimin mbi vakumin ligjor për nisjen e hetimit disiplinor. Në atë listë gjenden emrat e disa prokurorëve, të cilët kanë integritetit moral e profesional për të qenë drejtues dhe anëtarë të Strukturës së Posaçme Hetimore (SPAK) apo për të marrë mandatin e plotë të Prokurorit të Përgjithshëm.
Ndaj, sot, kur Arta Marku pretendon se nuk ka hapësira ligjore për të nisur procedimin disiplinor ndaj deputetëve, forcohen dyshimet se nisja e hetimit për 10 prokurorët e Krimeve të Rënda mund të ketë qenë thjesht dhe vetëm një manovër e saj për t’i nxjerrë ata nga gara për postin e saj apo për SPAK, nëpërmjet cënimit të imazhit.
Nga ana tjetër, mungesa e mekanizmave ligjorë për kontrollin e prokurorëve është justifikim i kotë, edhe për faktin se Kryeprokurorja e Përkohshme ka në dorë mekanizmin e hetimeve për çdo rast të dyshuar korrupsioni.
Gjatë një viti e gjysëm që është në detyrë, Arta Marku dhe vartësit e saj nuk kanë nisur asnjë hetim penal për prokurorët në detyrë. Ndërkohë, me gishtat e dorës numërohen procedimet penale për gjyqtarë, hetimet për të cilët kanë nisur nga investigimet mediatike.
Gjyqtari i Fierit, Roland Hysi, u arrestua për “korrupsion”, vetëm pasi një emision investigativ publikoi pamjet kur ai i merrte para një shtetaseje.
Për tre nga 5 gjyqtarët e Apelit që zbutën dënimin për Dritan Dajtin, Prokuroria nisi hetimin vetëm pasi ndaj trupës gjyqësore u lëshuan një lumë akuzash nga zyrtarët më të lartë qeveritarë, përfshirë edhe kryeministrin Edi Rama.
Prokuroria ende nuk ka dhënë një qëndrim zyrtar nëse ka nisur një hetim për prokurorin e Gjirokastrës, Spartak Çoçoli. Ai u akuzua në media për përfshirje në korrupsion. Prokurori Çoçoli vijon të jetë në detyrë.
Pas qëndrimit “justifikues” për mungesën e mekanizmave për kontrollin e prokurorëve, Arta Marku vijoi më tej. Ajo i bëri thirrje Parlamentit që të miratojë dispozitën kalimtare, në bazë të të cilës Prokurorit të Përgjithshëm i jepen kompetencat e Inspektorit të Lartë të Drejtësi, një strukturë që pritet të ngrihet së shpejti dhe që ka për detyrë inspektimin e gjyqtarëve dhe prokurorëve.
Kërkesa e Arta Markut duket absurde, në një kohë kur Reforma në Drejtësi kishte si qëllim pikërisht dobësimin e kompetencave të Prokurorit të Përgjithshëm, si për kontrollin e hetimeve penale, ashtu edhe për karrierën e prokurorëve.
Arta Marku, në fjalë të thjeshta, kërkon nga Parlamenti që t’i japë kompetencën për nisjen e procedimeve disiplinore ndaj prokurorëve. Pra, atë element të cilin ekspertët e Reformës në Drejtësi dhe partnerët ndërkombëtarë e kishin konsideruar si mekanizëm të Prokurorit të Përgjithshëm për të shantazhuar dhe ushtruar presion ndaj prokurorëve.
Arta Marku pritet të shpallë kandidaturën e saj për Prokurore të Përgjithshme me mandat 7-vjeçar, në procesin që Këshilli i Lartë i Prokurorisë hapi të Martën e datës 19 Mars 2019.
