Arrestohet ish-polici i Vlorës Renato Avdyli, i cili akuzohet se është i përfshirë në trafikun e drogës. Sipas hetimeve të dosjes “Treblova”, Avdylaj ka qenë pjesë e grupit të strukturuar kriminal.
“Policia ka kapur dhe ndaluar shtetasin e shpallur në kërkim, R.A., 38 vjeç, banues në Vlorë. Ndaj tij Gjykata e Shkallës së Parë për Krimet e Rënda Tiranë, me vendim nr.302, datë 01.10.2016 ka caktuar masën e sigurimit personal ‘Arrest me burg, për veprat penale ‘Kultivimi i bimëve narkotike’, dhe ‘Grup i strukturuar kriminal’. Materialet hetimore iu referuan Prokurorisë së Rrethit Gjyqësor Vlorë”, njoftoi zyrtarisht Policia.
Gjithçka lidhet me një operacion antidrogë në vitin 2016 gjatë të cilit u asgjësuan 18 parcela me kanabis në fshatrat Vezhdanisht dhe Treblovë. Për këtë grup kriminal, Gjykata ka dhënë dënimet për anëtarët e tjerë: 9 vite burg për Taulant Haxhiraj dhe 8 vite burg Shkëlqim Kociaj si dhe 8 vite Marjus Bajramin dhe 4 vite për Xhivalin Bacon. Prokuroria ka ngritur dyshime se grupi “Treblova” ka lidhje me Habilajt, për të cilët dosja u veçua dhe vijon të hetohet.
Përgjimet
Sipas dosjes hetimore: Me datë 07.08.2016 ora 10:30:00, ka një telefonate zhvilluar nga telefonuesi xxxxx686 që perdorej nga ana e personit nën hetim Renaldo Avduli dhe telefonuesit që përgjigjet xxxxx762 që perdoren nga ana e personit nën hetim Taulant Haxhiraj me këtë përmbajtje;
762- O vlla,
686-O vlla ca po bën ti,
762- Hiq, të keqen, ja ktej ?
686- N’gjo vllain se s’kam kohe të flas se jam në punë,
762- Hë vlla,
686- Po erdhi nonji nga Kruja atje mos e qas as per kafe as per tutje nonji i panjohur Krutan,
762- Ku vlla ?
686- Fushkruja. Aty,
762- Pse ?
686- Mos e qas thashë se është nga tanët hajtë (punonjës policie),
762- Nja nga Kruja ?
686-Eeee,
762-Mirë,
686-Hajtë,
762-Hajtë çau,
686-Hajtë.
/BN/
