Skënderbeu rigjen buzëqeshjen me fi tore ndaj Kukësit, por në shkallët e stadiumit nuk ishin më shumë se 2200 tifozë. Mungesa e tyre mbetet shqetësimi më i madh, në një kohë që në vitet e tjera një përballje Skënderbeu-Kukësi kishte të paktën 5 mijë shikues në Korçë.
Mbështetësit duket se i ka humbur prej kohësh edhe ekipi mik, që në sektorin enkas për tifozërinë e Kukësit, kishte vetëm 4 tifozë, një shifër qesharake kur mendon se ekipi i tyre lufton për titull. Në pistën e stadiumit, pikërisht në kabinën ku qëndrojnë delegati dhe vëzhguesi i ndeshjes, ishte i pranishëm edhe një polic.
Në bazë të marrëveshjes që FSHF ka bërë, ai qëndron aty për të bërë ndërlidhjen me uniformat blu dhe të zbatojë kërkesat e delegatit, në mënyrë që kur ka ndonjë incident t’i lajmërojë menjëherë. Ndërsa në pjesën jashtë stadiumit numri i forcave të rendit ishte i madh, teksa ata kontrolluan me imtësi edhe hyrjen e tifozëve në tribunat respektive. “Panorama Sport” ju sjell të gjitha pikantet e ndeshjes.
* Tribuna VIP ka qenë e mbipopulluar, ku të dyja klubet kanë pasur përfaqësuesit e tyre. Presidentët Takaj dhe Gjici kanë qenë pranë njëri-tjetrit. Gjatë 90 minutave nga të dy ndeshja është shoqëruar me psherëtima mërzie, por kjo u shfaq më së shumti te Gjici.
* Ndeshja nisi me gol për Skënderbeun, por trajneri Shehi në shumicën e kohës dhe herë pas here Kristi Vangjeli në fushë, u “tërhiqnin veshët” futbollistëve për gabimet në lojë. Shehi ka qenë aktiv afër pankinës, duke thënë shpesh: “Kristi, qarkulloni më shpejt topin, më shpejt”.
Më pas vijoi me Ditën, të cilit i kërkon që veç ndërtimit të lojës, të bëjë edhe punën e “pisët” në fushë, për të shkatërruar shpejt aksionet e kundërshtarëve. “Bruno, priti lart, i thyejmë që atje”, ishin këshillat e trajnerit të Skënderbeut.
* Nuk mbetej pas me këshilla edhe Kristi Vangjeli, që disa raste ka kërkuar llogari te shokët e ekipit. Një rast kur sulmuesi Krasniqi nuk u mbyll si duhet nga sulmuesi, Vangjeli pas një sprinti të fuqishëm i kthehet duke i kërkuar llogari: “Përpara atë dreq pasimi, përpara…”.
* Kukësi ishte i përgjumur në pjesën e parë, aq sa edhe vetë trajneri Cungu nuk dinte se çfarë të bënte më për t’i dhënë impulsin e duhur.
* Ajo që ngriti gjithë stadiumin në këmbë, ishte momenti kur Valdet Rama hyn në fushën e lojës. I gjithë stadiumi, i frymëzuar nga protesta e djeshme e opozitës në kryeqytet, oshëtin me thirrjet “Rama ik”. Kjo shkaktoi të qeshura të shumta në shkallët e stadiumit.
* Në fund të takimit, shefi i klubit kuksian, Jonuz Hallaçi, hyn në stadium me 11 pica për ekipin. Por, dëshpërimi ishte aq i madh sa nuk ka munguar edhe batuta e tij: “T’u çojmë për të ngrënë humbësve…”.
* Yli Shameti duket se e ka pësuar më keq. Kapiteni i Kukësit ka dalë nga dhoma e zhveshjes me gjurin e fashuar dhe shumë i dëshpëruar. “Diçka kam këputur, por se çfarë është, të shohim”, sqaroi ai. Shpresohet në dëmtim të lehtë, pasi për Kukësin do të ishte goditje.
* Për herë të parë që pas dëmtimit në vitin e kaluar, mesfushori Besar Musolli ishte i pranishëm dje në stolin e rezervave të Kukësit.
/Panorama Sport/
