Sektori i gjykimit në FSHF nuk u ndahet gafave dhe ndryshimeve në momentet e fundit të arbitrave. Dje në Skënderbeu-Kukësi ishte parashikuar kryesor Olsi Sokoli dhe anësorë Rejdi Avdo e Denis Rexha, por në mëngjesin e së shtunës, me një urdhër të FSHF-së, të tre arbitrat u ndryshuan.
Në Korçë u nis me urgjencë ndërkombëtari nga Elbasani, Enea Jorgji, bashkë me dy asistentët, Ridigert Çokaj dhe Nertil Bregasi, që gjithashtu mbajnë stemën e FIFA-s. Ndeshja e djeshme në përgjithësi shkoi mirë për arbitrat, por nuk munguan as gabimet ose më saktë, tolerimet që iu bënë disa ndërhyrjeve.
18’ Rroca ndërhyn ashpër ndaj Gripshit. Ka ngritje take, por Jorgji jep vetëm faull dhe kursen minimalisht të verdhin.
23’ Kukësi në kundërsulm, por akordohet pozicion jashtë loje skandaloz. Pamjet dëshmojnë të kundërtën.
25’ Gripshi gjuan topin dhe Maliqi e ndal. Pretendohet penallti, por pamjet tregojnë se është me duart e mbyllura. Gjithsesi, mbetet moment i diskutueshëm.
27’ Shameti gjuan në kokë pas shpine Sibon, rrezikon të kuqin dhe penallti.
78’ Ndërhyrje horror e Abazit në dëm të Maliqit. Takat janë dukshëm të ngritura dhe i kapin këmbën lojtarit të Kukësit, ndaj Enea Jorgji nuk mendohet dy herë dhe i tregon me të drejtë të kuqin.
/Panorama Sport/
