Nga Boldnews.al
Qeveria po nxjerr dhëmbët si bishë e plagosur që tashmë nuk njeh më ligj, moral, etikë apo standard procedural në shoqërime dhe arrestime. Një pjesë e Policisë së Shtetit dhe Gardës së Republikës është vënë në shërbim të Rilindjes, me detyrën e qartë për të shkaktuar terror mbi protestuesit, apo qytetarët e thjeshtë, duke mos kursyer as fëmijë e gra që veç ndotjes së ajrit në kryeqytetin e Lali Erit, po marrin edhe helmin e gazit lotsjellës.
Kjo është vetëm pjesa e dukshme, pasi struktura “paralele” në Policinë e Shtetit kanë krijuar grupimin e Posaçëm Operacional, ose “Kapuçëzinjtë e Ramës”.
Aksionin e radhës e patën dje në afërsi të Fakultetit të Shkencave Sociale, vetëm 30 minuta pas përfundimit të protestës së opozitës. Ata kryen operacionin e befasishëm që u mbyll me pesë të shoqëruar nga Fieri, mes tyre ish-deputeti i PD-së me mandat të djegur Luan Baçi, djali i tij dhe tre të rinj të tjerë.
Gazetari i Boldnwes.al u bë dëshmitar i kësaj ngjarje ku fillimisht u dha ideja se Forcat Operacionale po godisnin një grup të fuqishëm trafikantësh, vrasësish, apo terroristë. Por shfaqja kishte tjetër pamje përveçse shoqërimit të dhunshëm, goditjeve dhe fyerjeve: “Ule kokën të q… robt, mos lëviz, futu në makinë”… Këto ishin fjalët e shpeshta që britnin nga efektivë policie civil me kokën e mbuluar nga kapuçë të zinj, ndërsa përballë kishin katër të rinj të tramatizuar dhe të habitur pysnin: “Çfarë kemi bërë, mos godisni”…!
Nuk mjaftohen vetëm me kaq, por një agjent civil i identifikuar si efektivi Kreshnik Aliaj godet me grushta djalin e mitur të Baçit duke e gjakosur në fytyrë, pasi ai po filmonte ngjarjen dhe më pas largohet në një rrugicë, duke urdhëruar strukturën operacionale: “Merrini të gjithë”.
Po në këtë ngjarje, këtë strukturë “paralele”, duket se e njohin edhe efektivët e rendit të Repartit Shqiponja, që gjithsesi tregohen shumë më të matur, por të zënë ngushtë nga terrori që bënë kolegët e tyre, ulin kokën mos shfaqen në filmime dhe shprehen: “Nuk e dimë kush ishte, por do shoqërohet në polici”…
I gjithë ky terror me arome Rilindje, e dha shfaqjen e saj para qytetarëve, mes tyre edhe gra me fëmijë që kanë përfituar nga rrezet e diellit për të shijuar buzëpranverën, por panë buzët e çara dhe gjakun që rridhte nga fytyra e djalit të mitur të ish-deputetit. E kur dhuna nuk kursen as të “pushtetshmit”, ndonëse në opozitë, ajo është krejtësisht e “ligjëruar” mbi qytetarët e thjesht, që ende vijojnë të dalin masivisht në protestë.
Dje u shkel jo vetëm procedura standarde e shoqërimit por dukshëm ligjin, për atë shtet ligjor që flet kryeministri. Struktura e Forcës Lëvizëse Operacionale vihet në shërbim vetëm me urdhër të Drejtorit të Përgjithshëm të Policisë së Shtetit. Ata marrin pjesë në aksione të rëndësisë së veçantë ndaj strukturave të krimit të organizuar, terrorit, apo kur përballë kanë persona me rrezikshmëri të lartë.
Të pesë të shoqëruarit nga Fieri pasi u morën në pyetje u lanë të lirë. Edhe vetë agjentët që i morën me çështjen, e kuptuan se çdo prokuror apo gjyqtar sapo të njihej me dosjen do urdhëronte lirimin e menjëhershëm. Ndaj turpi dhe zbulimi i “Kapoçëzinjve të Ramës”, nuk duhej çuar deri në fund… Në vijim po kjo strukturë është gati, merr urdhra politik dhe aspak nga zinxhiri komandues i forcave të rendit.
Këtë strukturë të “re”, e njeh mirë kryepolici Ardi Veliu, Ministri i Brendshëm Sandër Lleshi dhe çdo drejtues tjetër policie, por po i justifikojnë veprimet e tyre të dhunshme për hir të mbajtjes së pushtetit, me çdo kusht, dhe në përdorimin pa masë të gazit lotsjellës dhe terrorit!
Mos u befasoni kur t’i shihni në rrugë, janë “Kapuçëzinjtë e Edi Ramës”, të ngjashëm me “Vullnetarët e Enverit” një grupim i dalë nga Akademia Ushtarake në vitin 1990, por që edhe vetë pushteti komunist u tregua më i përmbajtuar, duke e izoluar dhe penguar që vendi të shkonte deri në konflikt civil. Ndërsa Rama i ka nxjerrë sheshit me qëllim që të mbjellin terror dhe injektojnë frikë për të ngritur zërin në çdo protestë, të opozitës apo shoqërisë civile.
