Në mesin e muajit shkurt, në Greqi, “plasi bomba” nga trajneri i kombëtares greke: “Kam folur me lojtarin dhe dua që të kem në ekip Fiorin Durmishajn”. Kjo deklaratë e trajnerit të përfaqësueses helene i hapi udhë edhe të gjithë lëvizjes që sulmuesi 22-vjeçar të refuzonte Shqipërinë dhe të zgjidhte kombëtaren e Greqisë.
Mirëpo, dje është prezantuar lista e kësaj të fundit dhe bie në sy mungesa e emrit të sulmuesit të Panioniosit. Sipas mediave greke, fajtore për këtë është Federata Shqiptare ë Futbollit, e cila nuk ka qenë bashkëpunuese për të dorëzuar në kohë të shpejtë të gjithë dokumentacionin e nevojshëm, që lojtari të mund të debutonte në sfidat e para kualifikuese.
Në rast se është e vërtetë, kjo është manovra e vetme e palës shqiptare kundrejt sulmuesit, pasi nuk mund të bëjë asgjë tjetër për të ndalur vullnetin e tij që të zgjedhë përfaqësuesen helene. Gjithashtu, dje, në listën e Greqisë U-2, është publikuar edhe emri i Mario Vrushaj, mesfushorit të huazuar tek Uillem 2, i cili refuzoi Shpresat e drejtuara nga Alban Bushi për të qëndruar në përfaqësuesen helene.
