Kryetarja e LSI-së, Monika Kryemadhi zhvilloi këtë pasdite një takim me strukturat e LSI-së në kryeqytet, ku foli mes të tjerash për protestën e së të shtunës që do organizohet nga opozita.
Kryemadhi tha se protesta e 16 marsit do të jetë një protestë model nga të gjitha ato që janë zhvilluar deri tani. “Një nga protestat më të bukura e më të forta”, theksoi kryetarja e LSI-së. Një mesazh e dha edhe për kreun e qeverise Edi Rama, për të cilën tha se duhet të largohet.
“Ne s’kemi frike nga vdekja, jo te kemi frike nga një shëmtirë e shëmtuar”. Kështu e cilësoi Ramën-Kryemadhi.
Duke u ndaluar te deputetët që dorëzuan mandatet në vazhdën e nismës së opozitës, Kryemadhi tha se ata janë krenaria e saj dhe e LSI-së.
“Ne treguam se jemi të lirë dhe askush nuk mund të na mbajë peng apo të na bëje presione. Shumë shpejt do të kemi zgjedhje të parakohshme, zgjedhje të lira dhe të ndershme, që do ti kthejnë pushtetin qytetarëve”, tha Kryemadhi.
Kritikëve të kësaj lëvizje të opozitës, Kryemadhi i kujtoi mungesën e Gjykatës Kushtetuese, që bën të pamundur apelimin e ligjeve që sipas saj janë antikushtetuese. Këtu përmendi ligjin për teatrin, atë për pronat, për dividentin dhe amendamentet e LSI-së në ligjin për arsimin që u rrëzuan nga mazhoranca. /Boldenws.al/
